Ginatun-an sang gobyerno probinsiyal sang Negros Occidental kun anu nga legal action ang pwede himuon sa lima ka mga Negrense nga wala magsugid sang ensakto nga impormasyon sa pagpauli sa probinsiya halin sa United Kingdom (UK).
Suno kay Governor Bong Lacson nagpakilala bilang mga Locally Stranded Individuals ang lima, apang sang ulihi natukiban nga ini ang naghalin sa London basi man sa ila mga passports.
Duha sa lima ang nagpositibo sa virus samtang negatibo ang tatlo nga taga EB Magalona.
Ang duha amo ang mag asawa nga taga Brgy. Antipolo Pontevedra.
Desyembre 30, 2020 sang mag abot ang mag asawa sa Manila halin sa London via Istanbul kag gilayon nga gin swab test.
Sunod nga adlaw sang magwa ang negative results, apang ginpaidalom sa gihapon sa 16 ka adlaw nga hotel quarantine samtang nagahulat sang IATF approval nga makapauli.
Enero 16, 2021, nag abot ang mag asawa sa Negros Occidental, liwat gin swab test, gin home quarantine, kag nag positibo ang resulta nga ginpagwa Enero 18.
Sa karon ginatinguhaan sang probinsiya nga mahibaluan kun UK variant gid man ang naglaton sa mag asawa, nga subong naka quarantine sa facility sang Pontevedra. | Aksyon Marlon Genovea
