LALAKI PATAY SANG GINTIRO SA SULOD SANG KWARTO

Share on facebook
Share on pinterest
Share on twitter
Share on print
(BCPO Photo)

Patay ang 59 anyos nga lalaki matapos ginluthang samtang nagapaniyapon sa sulod sang kwarto sa iya balay sa DC 1 Regeant Pearl Homes Subdivision, Barangay Alijis syudad sang Bacolod mga las 6:30 subong nga gab-i, Enero 12.

Ang napatay ginkilala kay Jeffrey Parandas kag ginkumpirmar sang otoridad nga yara sa drug watchlist.

Sa interview sang Aksyon Radyo, ginpahayag ni Police Station 7 commander Lt. Conrado Espino nga tatlo ka tawo ang nakit-an, duha diri ang nagsulod sa balay ni Parandas kag nakit an man duha ka motorsiklo nga amo man ang ila ginsakyan matapos ang krimen.

Dugang pa ni Espino, nakabati sang isa lamang ka lupok ang testigo apang wala mahibaluan kon ano nga sahi sang armas luthang ang gin gamit.

Sa inisyal nga nakit-an, pilas sa ulo ang naangkon ni Parandas.

Samtang, dako ang pagpasalamat sang 31 anyos nga masahista matapos nga wala ini gin ulamid sa natabo nga pagpatay sa iya customer nga si Parandas.

Sa interview sang Aksyon Radyo, ginpahayag sang testigo nga nakibot na lamang ini sang gintayaan siya sang armas kag ginpahapa’.

Sa nakit-an sang testigo, nakasuksuk lamang sang facemask ang nagtiro kay Parandas apang wala na sini madetalyi kon ano ang suksuk sang duha pa ka mga suspetsado matapos ini nga ginpahapa kag ginlapakan pa ang iya ulo.

Samtang, ginakahangawa lamang sang testigo bangod ang iya bag gindala sa diin, nasulod ang importante nga mga dokumento sang motor subongman dokumento sang iya kabataan.

Hungod nga ginhinago ang ngalan sang masahista nga nagserbi testigo bilang proteksiyon sa iya seguridad.

Sa karon, padayon ang imbestigasyon sang kapulisan sa motibo sang pagpatay.

Ginlaragway ni Edward ang magulang sini nga si Jeffrey Parandas nga isa ka mabinuligon nga tawo.

Ginpahayag ni Edward nga wala siya sang ideya kon may koneksiyon sa droga ang pagpatay sa iya magulang matapos nga gin alegar wala ma ini naga usar sang illegal drugs.

Dugang pa ni Edward nga ang matuod may yara pa sang mga aduptiba ang iya magulang bangod nagaisahanon lamang ini.
Palayag pa ni Edward, nagaserbi sadto bilang fixer sa LTO si Parandas.

Samtang, nagalaom si Edward nga mahatagan sang kasolbaran ang kaso kag madakpan ang may kahimuon sang pagpatay sa iya nga magulang sa sulod mismo sang iya balay.

Sa karon, padayon ang imbestigasyon sang kapulisan sa motibo sang pagpatay. | Aksyon John Diaz, Aksyon Ann Defensor

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.