LALAKI PATAY MATAPOS GIN TIRO SA KABANKALAN

Share on facebook
Share on google
Share on pinterest
Share on twitter
Share on print

Dead on arrival sa Tabugon Hospital sa syudad sang Kabankalan si Jerry Boy Caldo, 47 anyos nga amay matapos ginluthang kahapon sang iya tupad balay sa Prk. Kawayan, Brgy. Tagoc, Kabankalan.

Ang suspek ginkilala kay Jose Marie Hervias, 53 anyos nagapuyo sa amo nga lugar.

Suno kay P/Lt John Paul Tabujara, sang Kabankalan City PNP, bangod gid lamang sa madugay na nga dinumtanay kag kaakig, ginbantayan kag ginluthang sang suspek si Caldo gamit ang homemade pistolized type 12 gauge shotgun.

Dugang pa ni Tabujara, patay na sang gindala sa ospital si Caldo matapos nakaangkon sang malubha nga pilas nga sa dalum sang nawala nga ilok.

Bulontaryo naman nagsugka sa pulis si Hervias matapos ang insidente. | Aksyon Alvin Grava

KAPIN 3K KA PAMILYA NGA GINLOCKDOWN SA BACOLOD, MAKABATON SANG AYUDA

Ginsumiter na sang Department of Social Services and Development ukon DSSD Bacolod sa DSWD Region 6 ang listahan sang mga pigado nga mga pamilya nga na apektuhan sang lockdown nga makabaton sang 6,000 nga ayuda sa idalum sang Bayanihan 2.

Ini nga mga pamalay ang ginlockdown ukon gin sealed off humalin Setyembre 11 tubtob Disyembre 29, 2020.

Suno kay Pacita Tero, pamuno sang DSSD, kapin 3,000 households ang benepisyaryo sang amo nga programa sa Bacolod.

Sa karon, nagahulat ang DSSD sang komunikasyon gikan sa Region 6 angut sa proseso kag schedule sang payout.

Samtang, gin pahayag ni Tero, nga may pila pa ka mga ‘waitlisted’ sa Bacolod ang ginapaabot nga magbaton sang 6,000 nga ayuda sa idalum sang Bayanihan 2. Ang waitlisted amo ang mga pigado nga pamilya pero wala nalakip sa first kag second tranche sang Social Amelioration Program. | Aksyon Dale Salazar

LIMA KA PERSONNEL SANG NBI-BACOLOD, NAGPOSITIBO SA COVID-19

Temporaryo nga ginpasira ang talatapan sang National Bureau of Investigation (NBI) Bacolod, matapos nagpositibo sa Covid-19 ang lima ka mga personnel sini.

Sa interview sang Aksyon Radyo Bacolod ginpahayag ni NBI Bacolod Head Atty. Renoir Baldovino, 25 ka mga personnel ang ginpaidalom sa RT-PCR swab tests nagligad nga Biyernes kag Sabado , kag lima sa mga ini nga lunsay mga babaye ang nagpositibo sa Covid-19.

Bangud sini suno kay Baldovino, ginmando sang Local Inter-Agency Task Force (LIATF) Bacolod ang pagpasira sang NBI office, agud mapaidalom sa disinfection.

Dugang pa ni Baldovino, napaidalom na sa isolation ang lima ka mga nagpositibo sa quarantine facility sang syudad sa Brgy. Villamonte.

Ginpatigayon naman ang contact tracing sa mga naka close contacts sang Covid-19 positive.

Nag umpisa ang pagpasira subong nga Lunes Enero 18 tubtub Enero 22, 2021. Magabalik ang operasyon sang NBI Bacolod sa Enero 25. | Aksyon Marlon Genovea

MORE STORIES:

LIKE US ON FB

error: Ooops... You are not authorized to copy this content.