LALAKI PATAY MATAPOS GIN TIRO SA CADIZ

Share on facebook
Share on google
Share on pinterest
Share on twitter
Share on print

Patay ang 44 anyos nga lalaki sa nagluntad nga pagpangluthang sa Hda. Tapon Brgy. Daga, siyudad sang Cadiz.

Ang biktima ginkilala kay Loreto Europa Jr., residente sang Hda. Israel sang amu man nga Barangay kag siyudad.

May duha ka pilas sa tyan kag duha man ka mga pilas sa natuo nga paa ang biktima.

Suno sa asawa nga si Mary Jane, naga sakay sa motorsiklo ang iya bana kag papuli na sang natabo ang insidente.

Dugang pa sang asawa, antes nawad-an sang pagginhawa ang iya bana, naka hambal pa ini kun sin-o ang nag tiro sa iya.

Palayag pa sa asawa nga sadtong Setyembre 22, 2017, gin tiro man ang iya bana kag naka angkon sang apat ka pilas.

Padayon pa karun ang imbestigasyon sang kapulisan sang Cadiz sa sini nga pag pang luthang. | Aksyon Dorel Cabatu

GOV LACSON NAGPAIDALUM SA SELF-ISOLATION

Nagpaidalom sa self-isolation si Governor Bong Lacson umpisa subong nga adlaw, kalakip ang 18 ka mga empleyado sang Department of the Interior and Local Government (DILG) Negros Occidental.

Ini matapos magpositibo sa COVID-19 ang isa ka DILG Iloilo employee, nga nagtambong sa Provincial Anti-Drug Abuse Summit sang Biyernes Enero 22.

Suno kay Provincial Administrator Atty. Rayfrando Diaz II, si Lacson kag 18 ka mga DILG employees ang natalana nga magpa swab test bwas nga adlaw.

Dugang pa ni Diaz, kinahanglan nga magpa self-isolate ang gobernador bangud siya ang isa sa mga naghatag sang certificate of appreciation sa empleyada nga nagpositibo sa COVID-19.

Kalakip sa magapakuha sang swab test amo si DILG Negros Occidental OIC Provincial Director, Roselyn Quintana.

Gintalana sang gobyerno probinsiyal ang Mambucal Mountain Resort sa Minoyan Murcia nga amo quarantine facility nga teneran sang mga ini, samtang nagahulat sa resulta sang swab test.

Ginklaro man ni Diaz nga isa man siya sa mga nakatambong sa amo nga summit, apang wala maka close contact sa nagpositibo nga DILG official nga makabig bilang Authorized Person Outside Residence (APOR).

Setyembre 4, 2020, si Lacson ang nagpaidalom man sa self-isolation matapos magpositibo sa COVID-19 ang utility worker assign sa Governor’s Office. | Aksyon Marlon Genovea

BACOLOD MAY YARA NA LAMANG SANG 10 KA VACCINATION CENTERS

May yara na lamang sang 10 ka mga vaccination centers ang syudad sang Bacolod para sa pagbakuna sa tion nga mag abot na ang Covid-19 vaccines.

Suno kay Councilor Renecito Novero, chair sang vaccination action center team, humalin sa 22 ka proposed vaccination centers, ini ang ginpanubuan sa 10, base man sa ginkasugtan sa damlag lang pagsinapol sang Covac council.

Ginpaathag ni Novero, nagakaigo na ang pulo ka vaccination centers bangud kon pasubrahan posible indi ini masarangan sang mga healthcare personnel, resources, ukon logistics. Ang vaccination centers ang nahamtang sa strategic areas.

Sa karon, indi pa mapalayag ni Novero ang lugar bangud ginavalidate pa ini sang iya team, Bacolod City Health Office, City Engineer’s Office kag iban pa.

Ang syudad ang una na nga nagbakal sang 650,000 doses sang vaccine gikan sa AstraZeneca pero wala pa mahibaluan kon san-o ini maga-abot. | Aksyon Dale Salazar

MORE STORIES:

LIKE US ON FB

error: Ooops... You are not authorized to copy this content.