KONSTRUKSYON SANG TATLO KA MERKADO SA BACOLOD, NAG UMPISA NA

Share on facebook
Share on google
Share on pinterest
Share on twitter
Share on print

Nagumpisa na ang konstruksyon sang tatlo ka mga public market sa Barangay Sum-ag, Barangay Banago kag Barangay Granada.

Suno kay Congressman Greg Gasataya, ang proyekto sa Barangay Sum-ag amo ang pinakadako bangud ini ang 2 storey kag ang ikaduha nga panalgan ang pagahimuon nga parking area.

Dugang pa sang Kongresista, iya ginduso duha ka tuig ang nakaligad ang ini nga proyekto sa tuyo nga ma decongest ang mga naga pangumpra sa tatlo ka mayor nga merkado sang syudad nga magaresulta sa paghagan-hagan sang lakat sang trapiko.

Suno kay Gasataya, sa tion nga matapos ang proyekto, ang merkado sa Sum-ag ang mas lapit sa mga pumuluyo sa Barangay Tangub, Pahanocoy, Sum-ag kag Pnta Taytay.

Ginapaabot nga matapos ang ini nga mga proyekto subong nga tuig sa idalum sang pondo sang DPWH. | Aksyon Dale Salazar

BANGKAY SANG LALAKI, NASAPWAN

Tubtub karon wala pa makilala ang bangkay nga nasapwan sa baybayon sa boundary sang siudad sang Bacolod kag Buenavista, Guimaras kaina sang aga. Pebrero 24.

Nakita nanday Joey Sanchez kag Charlie Chavez sang Barangay Sum-ag syudad sang Bacolod ang bangkay mg alas otso y media kaina sang aga, Myerkules.

Ginpakamaayo ni Sanchez kag Chavez nga indi na lang magpangisda sa baylo gin-guyod nila ang patay pahigad gamit ang lubid pakadto sa suba sang Barangay Sum-ag.

Nag-abot man ang Scene of the Crime Operatives ukon SOCO sa suba sang Barangay Sum-ag agod magkuha sang mga ebidensya sa crime scene.

Suno kay Police Lt. Lanie Deriada hepe sang Police Station 9 ang bangkay isa ka lalaki, ginabulubanta nagapangidaron sang 20 anyos, 5’0 ang height kag karon  nahaya na sa Villanueva Funeral Parlor sa Barangay Mansilingan.

Sarang makapakig-angot ang pamilya sa Police Station 9 para sa dugang nga impormasyon. | Aksyon Eric Magbanua

GRUPO SA BACOLOD GINADUSO SI VP ROBREDO NGA MAGPAPILI PRESIDENTE

Magapatigayonn sang signature campaign sa syudad sang Bacolod ang grupo sang “Bunyog Pagkakaisa” agud magpakita sang suporta para kay Vice President Leni Robredo.

Suno kay Thezz Polano, tuyo sang ila hanay nga magpakita sang suporta kay Robredo agud magpapili ini bilang presidente sa 2022 National election.

Nagapati si Polano nga ang performance ni Robredo nagapakita nga makasarang ini sa pagdumula sang pungsod. | Aksyon Alvin Grava

MORE STORIES:

LIKE US ON FB

error: Ooops... You are not authorized to copy this content.