Nakig-unong kag nagpalab-ot sang pagpangamuyo ang House of Representatives sa pamilya ni anay Negros Occidental Governor Alfredo G. Marañon Jr., nga nangin kongresista man sang ikaduha nga distrito sang Negros Occidental sa 10th, 11th kag 12th Congresses.
Ini ang ginpalab-ot sang kamara paagi sa House of Representatives official FB page.
Suno sa kamara, indi malipatan ang mga maayo nga hinimuan ni Marañon, pagka kampeon sa patag sang agrikultura kag aspiration sini bilang isa ka simple nga mangunguma kag mangingisda.
Si Marañon ang nagtiglawas sa Negros Occidental sa regular batasang pambansa sadtong 1984 tubtub 1986 kag nag-kongresista sang ikaduha nga distrito umpisa 1995 tubtub 2004.
Huwebes sang gab-i sang magtaliwan si Marañon sa hospital sa edad nga 84, bangud sa komplikasyon may kaangtanan sa iya cardiac health. | Aksyon Marlon Genovea
Gina imbestigahan sang syudad sang Bacolod ang gin alegar pag tamper sang resibo nga gin isyu sa violator nga gin isyuhan sang citation ticket sang Bacolod Traffic Authority Office.
Suno kay Jose Antonio Robello, deputy head sang BTAO, 2,300 pesos ang penalidad sang lalaki nga violator bangud nag maneho sang motorsiklo nga wala sang helmet kag driver’s license nagligad nga Abril 18, 2024.
Sa amo nga penalidad, 1,000 pesos ang bayad sa towing, samtang 1,300 pesos sa pag drive nga wala sang helmet kag wala sang lisensya.
Ginpahayag ni Robello, nagbayad ang violator sang 1,300 pesos sa babaye nga cashier sang City Treasurer’s Office nga assign sa BTAO pero gin alegar 300 pesos lamang ang gin encode.
Gin alegar nga ginbutangan sang cashier sang ‘1’ ang resibo para ini ang mangin 1,300 pesos.
Suno kay Robello, sa ila nga pag usisa, 300 lamang ang nagsulod sa system nga bayad bisan 1,300 ang ginbayaran sang violator.
Ang reklamo ang una gin padangat sa Isugid kay Mayor nga programa. Ang cashier nga ginareklamo ang isa ka regular nga empleyado.
Luyag lamang ni Robello nga maklaro nga wala sang BTAO personnel ang imbolbado dire.
Ginklaro sini nga wala sila nagabaton sang kwarta nga bayad sang mga violator kundi naga isyu lamang sang citation ticket.
REAKSYON NI MAYOR ALBEE
Dismayado si Bacolod Mayor Albee Benitez sa nabaton nga reklamo batuk sa cashier sang City Treasurer’s Office nga assign sa BTAO bga gin reklamo nga nag tamper sang resibo.
Sa interview sang media, Myerkules, ginpahayag sang Alkalde, nga atubangon sang regular nga empleyado ang konsekwensya kag ini ang ipaidalum sa due process.
Ginkumpirmar ni Benitez nga gin saylo na ang ginareklamo sa iban nga trabaho kag indi na cashier nga assign sa BTAO. Ginpahayag ni Benitez, indi na sini kinahanglan nga suliton ang iya panindugan batuk sa korapsyon kag posible luyag nila nga may ma ‘sampolan’.
Gina kilala naman sang alkalde ang mga tawo nga nagapangisog nga mag reklamo kontra korapsyon bangud nagapati nga ang pagtinlo sa gobyerno ang indi lamang iya responsibilidad.
Nagpasiguro si Benitez nga iya gilayon aktuhan ang mga ginapadangat nga reklamo.
Nagahulat pa ang ang Philippine Drug Enforcement Agency sang updated guidelines gikan sa Dangerous Drugs Regulation Board antes liwat magpatigayon sang drug clearing activities sa mga Bureau of Jail Management and Penology facilities.
Suno kay Shey Tanaleon, spokesperson sang PDEA Region 6, bangud sa pandemya sang tuig 2020 nagpatuman sang moratorium ang BJMP rason nga gin-untat ang ginapatigayon nga drug clearing activities apang ginbatak na pero nagahulat pa sang bag-o nga guidelines.
Isa sa mga idugang sa guidelines suno kay Tanaleon amo ang dapat nga may yara sang drug free workplace committee ang kada pasilidad para amo ang magatan-aw sang tanan nga aktibidad nga patigayunon.
Ginklaro ni Tanaleon nga indi lang greyhound operation kag drug testing ang ginapatigayon sa drug clearing operation kundi naga patigayon man sila sang mga seminars sa mga Persons Deprived of Liberty (PDL).
Ginpahayag man ni Tanaleon nga isa man ini ka requirement para ma deklarar nga drug free ang isa ka probinsya. Sa karon, nagapadayon naman ang ila search and seizure operations.
