KASO BATOK KAY KAPITAN TEJADA KAG APAT PA KA MGA EMPLEYADO SANG BARANGAY SA HIMAMAYLAN GINBASURA SANG KORTE

Share on facebook
Share on google
Share on pinterest
Share on twitter
Share on print

Ginbasura sang korte ang mga kaso nga ginpasaka batok kay Barangay To-oy, Himamaylan Kapitan Tezardo Tejada kag apat pa ka empleyado sa barangay may kaangtan sa reklamo sa tagtaganay sang ayuda sa idalom sa Social Amelioration Program ukon SAP.

Sa interview sa Aksyon Firing Line, ginpahayag ni Atty. Dag Pandan, legal counsel ni Tejada nga wala na establisar ang mga akusasyon batuk sa iya kliyente kag sa apat pa ka respondents.

Dugang pa ni Pandan nga sa pagbaton pa lamang nila sang subpoena, ila na nakumpirmar nga gin-tamper ang pila ka dokumento nga gingamit sa pagpasaka sang kaso.

Palayag pa ni Pandan nga indi man ang barangay ang nagadesisyon kon sin-o ang hatagan kundi mismo ang Department of Social Welfare and Development rason nga tama kalayo sang mga akusasyon angot sa SAP.

Una diri, kaso nga Falsification of Public /Official Documents under Article 72 of the Revised Penal Code, Violation of R A 6713 Code of Conduct and Ethical Standards for Pubmic Officials and Employees kag paglapas sa RA 11469 ukon Bayanihan Heal As One Act ang ginpasaka batuk kay Tejada, Barangay Secretary Josephine Mongcal kag mga Barangay Health Workers nga sanday Gerelyn Gomez, Ma. Cristina Nifras kag Gina Ortega. | Aksyon Ann Defensor

PANGABAY NI CONG GASATAYA NGA DUGANG NGA SENIOR CITIZENS NGA MAKABENEPISYO SANG SOCIAL PENSION, VERIFIED NA SG DSWD

Na-verified na sang Department of Social Welfare and Development (DSWD) ang request ni Bacolod Lone District Congressman Greg Gasataya nga dugang nga senior citizens nga makabenepisyo sang social pension.

Sa interview sa Aksyon Hotline, ginpahayag ni Gasataya nga sa karun 2,700 lamang ang existing nga benepisyaryo sang social pension sa Bacolod. Ang mga nasambit nga pensioners ang wala gid sang may ginabaton nga anu man nga pension kaangay sang SSS, GSIS kag iban pa.

Suno kay Gasataya, 4,000 ka mga senior citizens ang nadugang sa listahan sa diin beripikado na man ini sang DSWD.

Nahibaloan, ang nasambit nga mga pensioners ang nagabaton sang P500.00 kada bulan gikan sa DSWD.

Dugang pa ni Gasataya, may gin-file na man nga hagna nga nagapadugang sang social pension apang sa karun pending pa ini sa kamara.

TATLO KA MGA OPISYAL NGA NAKATUPAD NI GOV LACSON SA ANTI DRUG SUMMIT, NEGATIBO SA COVID-19

Negatibo sa Covid-19 ang tatlo ka mga opisyal nga nakatupad ni Governor Bong Lacson sa Provincial Anti-Drug Summit syudad sang Bacolod sang Biyernes Enero 22, 2021.

Ini ang gin anunsiyo sang gobernador subong nga adlaw, kasunod sang iya pagpa swab test sa Teresita L. Jalandoni Provincial Hospital sa syudad sang Silay.

Ang tatlo amo sanday DILG Negros Occidental OIC Provincial Dir. Roselyn Quintana, Asst. Reg’l. Dir. Maria Calpiza Sardua, kag Liga ng mga Barangay Pres. kag Neg. Occ. Board Member Juvy Pepello. 

Sila kag si Lacson ang kalakip sa mga opisyal nga close contacts sang DILG Iloilo official nga nagpositibo sa Covid-19 kag nagtambong man sa summit.

Suno sa gobernador, mahibaluan ang resulta sang iya swab test karon sa gab-i kag nagalaom nga magnegatibo agud makabalik sa gilayon sa pagreport sa kapitolyo probinsiyal.

Dako ang pagsalig ni Lacson nga siya ang mag negatibo, bangud wala man sang sintomas nga ginabatyag.

Si Lacson ang nagpaidalom sa self-isolation umpisa kahapon Enero 26.

MORE STORIES:

LIKE US ON FB

error: Ooops... You are not authorized to copy this content.