Ginalantaw sang Police Station 2 nga droga ang rason sa pagpatay kay Medelyn Benignos, 29 anyos, dalaga kag pumuloyo sang Purok Lampirong Barangay 2 syudad sang Bacolod.
Sabado sang gab-i sang gintiro sang riding in tandem gamit ang calibre 45 si Benignos samtang sakay sa tricycle sa South Capitol Road Barangay 8 syudad sang Bacolod nga nagresulta sang iya kamatayon.
Suno kay Police Lt. Andy Ofalia, Deputy Police Chief sang Police Station 2,, ginasuspetsuhan si Benignos nga asset sang isa ka drug enforcement unit.
Suno kay Ofalia, antis ginpatay si Benignos sadtong Sabado sang gab-i nakigkita pa ini sa isa ka kilala nga drug personality nga bag-o lang makagwa sa prisohan matapos maka-apply sa plea bargaining agreement.
Magluwas sini may inpormasyon man nga nabaton ang Police Station 2 nga may anay amo si Benignos nga drug personality nga ginpatay sa area sang Police Station 3 sang nagligad nga tuig.
Suno kay Ofalia, wala pa nila makilala ang duha ka persona nga nagpatay kay Benignos. | Aksyon Eric Magbanua