KAPITOLYO INDI MAGPATUMAN SANG SKELETAL WORKFORCE

Share on facebook
Share on google
Share on pinterest
Share on twitter
Share on print

Wala sang rason nga magpatuman sang ‘skeletal workforce’ ang gobyerno probinsiyal sang Negros Occidental,  bisan pa nagapadayon ang pagdamo sang kaso sang Covid-19 sa syudad sang Bacolod  kag Negros Occidental.

Ginpahayag ni Provincial Administrator Atty. Rayfrando Diaz II nga magapabilin ang ginapatuman nga health kag safety protocols sa mga talatapan sang gobyerno probinsiyal  kag regular  man ang ginapatigayon nga disinfection  kag  swab test  sa  mga medical frontliners.

Dugang pa  ni Diaz,  maga implementar lamang ang probinsiya sang bag-o nga estratihiya kun kinahanglanon.

Ginklaro  ni Diaz nga handa man si Governor Bong Lacson sa ‘face-to-face’ interview sang  mga media, bisan pa nga ginpatuman ang ‘no-entry’ policy sa Governor’s office sang Lunes. | Aksyon Marlon Genovea

17K NGA BALOR SANG SUSPECTED SHABU NAKUMPISKAR; SUBJECT SA BUY-BUST OPERATION, NAKAPALAGYO

Nakapalagyo ang subject sa buy-bust operation nga si Ronel Balaquet sa 1st Road Puentebella, Barangay Taculing syudad sang Bacolod, kaina sang hapon, Sabado.

Ang nakapalagyo ang nalakip sa drug watchlist sang Police Station 6 kag ginakabig street level individual.

Suno kay Police Major Leo Estopa, hepe sang Police Station 6, pila na ka reklamo ang ginpadangat batuk sa iligal nga aktibidad ni Balaquet.

Dugang pa ni Estopa, namutikan ni Balaquet nga pulis ang iya ka transaksyon kag nakapalagyo kasunod nga madamo sang exit ang ila compound.

Nabilin ni Balaquet ang isa ka pouch nga naga unod sang 10 ka sachet sang suspected shabu.

Kapin 17 mil ang balor sang ginapatihan shabu ang narekober sang Police Station 6.

PRIMARY SUSPECT SA MASSACRE GIN-AKO ANG KRIMEN

Gin-ako sang primary suspect nga si Christian Tulot nga siya ang nagpatay sa apat ka miembro sang pamilya sa Gardenville Subdivision, syudad sang Bacolod nagligad nga Abril 4.

Si Tulot ang naghimo sang extra judicial confession kag iya ini ginpalayag sa atubangan sang iya abogado, kapulisan kag katapo sang media subong nga hapon, Abril 10.

Suno kay Tulot, ang konsensya amo ang nagduso sa iya para akuon ang krimen.

Ginpakita sang kapulisan ang martilyo kag espading nga gin usar sa krimen kag ini ang gin ako sang suspek.

Gin ako man sang suspek nga iya man gindala sa iya gintiniran sa Barangay Bunga, Don Salvador Benedicto ang mga cellphone, kag iban nga gamit nga iya ginkuha.

Abril 4 sang natabo ang krimen pero Abril 7 sang natukiban sang kapulisan.

Ginkilala ang mga biktima amo sanday John Michael Espinosa, Jocelyn Nombre Espinosa, , Gemma Espinosa kag ng anum ka tuig nga si Precious Espinosa.

Nagpangayo sang pasensya si Tulot sa pamilya sang mga biktima kag sa Ginoo bangud sa krimen nga iya ginhimo.

Nagpangayo man sang pasaylo si Tulot sa kapulisan, sa publiko kag sa media bangud sa iya pagbinutig.

Ginalantaw sang kapulisan nga ang paghatag sang extra judicial confession ni Tulot ang bangud nga nagtahaw na ang epekto sang iligal nga droga.

Ginpahayag ni Police Major Joery Puerto, hepe sang Police Station 8, nga sa Lunes nga adlaw ila ipasaka ang kaso nga multiple murder with robbery batuk kay Tulot.

Para kay Puerto, napukaw ang suspek sa iya nga konsensya kag naserbe na ang hustisya.

Kaina sang hapon, sang gin lubong na ang mga biktima sa Bacolod Memorial Park.

MORE STORIES:

LIKE US ON FB

error: Ooops... You are not authorized to copy this content.