Ginpasaka sang CIDG-Bacolod ang kaso nga pag lapas sang Anti-graft and corrupt practices act and ethical standards for public official and Employee kag pagbayolar sang Bayanihan Act batok kay Barangay 39 Punong Barangay Jude Salusada kag 10 ka iban pa may angot sa ma anomalya sa pagpatuman sang Social Amelioration Program (SAP).
Suno Kay P/Chief Master Sgt Ramiro Gocotano, pamuno sang CIDG-Bacolod, ang 11 ka mga opisyal kag personnel Barangay nga gin pasakaan kaso amo sanday Kapitan Salusada, Kgd. Rogelio Faltiquera, Brgy. Sec. Rosenie Caballero, Brgy Treas. Ma. Salve Atienza, Marites Aragon kag mga Barangay Health Worker nga sanday Rogelio Faltiquera, Lolita Plorida, Rosela Plagata, Beth Fernando, Really Facturan kag Neely Lorenton.
Suno Kay Gocotano, lima ka mga pumuloyo sang Brgy. 39 nga sanday Udrick Magbanua Jr kag 4 pa ka iban ang nagpalapit sa ila ahensya agud magreklamo batok sa pila ka mga opisyal kag empleyado sang ila Barangay bangod sa alegasyon nga indi patas nga pagpanagtag sang ayuda.
Dugang pa ni Gocotano, pila ka mga miembro sang pamilya sang mga amo nga opisyal kag mga ka-alyado gikan sa iban nga barangay ang gin alegar nakàbaton sang ayuda kag indi ang ang mga pigado.
Sa bahin ni Salusada, iya gina kabig nga pamulitika kag political harrassment ang pag file sa iya sang kaso.
Suno kay Salusada, ginpahayag sini nga mga lunsay pumuluyo sang Brgy 39 ang mga nakàbaton sang ayuda kag kung may nalakip nga gikan sa iban pa nga barangay, ina amo ang mga registered voters sa ila Barangay nga na-relocate apang kwalipikado nga makabaton sang ayuda.
Gin-ako man sini nga may pila man ka miembro sang pamilya sang mga opisyal ang nakàbaton apang ginakunsidera pigado kag nadulaan trabaho bangod sa pagpamahog sang Covid-19. | Aksyon Alvin Grava