KAPIN 3K KA PAMILYA NGA GINLOCKDOWN SA BACOLOD, MAKABATON SANG AYUDA

Share on facebook
Share on google
Share on pinterest
Share on twitter
Share on print

Ginsumiter na sang Department of Social Services and Development ukon DSSD Bacolod sa DSWD Region 6 ang listahan sang mga pigado nga mga pamilya nga na apektuhan sang lockdown nga makabaton sang 6,000 nga ayuda sa idalum sang Bayanihan 2.

Ini nga mga pamalay ang ginlockdown ukon gin sealed off humalin Setyembre 11 tubtob Disyembre 29, 2020.

Suno kay Pacita Tero, pamuno sang DSSD, kapin 3,000 households ang benepisyaryo sang amo nga programa sa Bacolod.

Sa karon, nagahulat ang DSSD sang komunikasyon gikan sa Region 6 angut sa proseso kag schedule sang payout.

Samtang, gin pahayag ni Tero, nga may pila pa ka mga ‘waitlisted’ sa Bacolod ang ginapaabot nga magbaton sang 6,000 nga ayuda sa idalum sang Bayanihan 2. Ang waitlisted amo ang mga pigado nga pamilya pero wala nalakip sa first kag second tranche sang Social Amelioration Program. | Aksyon Dale Salazar

BANGKAY SANG LALAKI, NASAPWAN

Tubtub karon wala pa makilala ang bangkay nga nasapwan sa baybayon sa boundary sang siudad sang Bacolod kag Buenavista, Guimaras kaina sang aga. Pebrero 24.

Nakita nanday Joey Sanchez kag Charlie Chavez sang Barangay Sum-ag syudad sang Bacolod ang bangkay mg alas otso y media kaina sang aga, Myerkules.

Ginpakamaayo ni Sanchez kag Chavez nga indi na lang magpangisda sa baylo gin-guyod nila ang patay pahigad gamit ang lubid pakadto sa suba sang Barangay Sum-ag.

Nag-abot man ang Scene of the Crime Operatives ukon SOCO sa suba sang Barangay Sum-ag agod magkuha sang mga ebidensya sa crime scene.

Suno kay Police Lt. Lanie Deriada hepe sang Police Station 9 ang bangkay isa ka lalaki, ginabulubanta nagapangidaron sang 20 anyos, 5’0 ang height kag karon  nahaya na sa Villanueva Funeral Parlor sa Barangay Mansilingan.

Sarang makapakig-angot ang pamilya sa Police Station 9 para sa dugang nga impormasyon. | Aksyon Eric Magbanua

BACOLOD NAGTUKOD SANG PSYCHOSOCIAL FIRST AID TEAM

May gintukod nga team ang siudad sang Bacolod paagi sa CDRRMO para sa mga tawo nga nagabatyag sang depresyon ukon ano man nga hibubon-ot. 

Sa interview sa Aksyon Hotline, ginpahayag ni Executive Assistant kag CDRRMO Head Joemarie Vargas, ang siudad ang may gintukod nga Psychosocial First Aid (PFA) nga amo ang magabulig sa mga tawo ilabi na sa may problema mental health.  Suno kay Vargas, sa idalom sang PFA, ang mga tawo ukon indibidwal nga naga-angkon sang depresyon ang pwede gid makapanawag sa ila kag makapabutyag sang hibubon-ot.

Suno kay Vargas, ini nga tikang ang kabahin man agud ma-solusyonan ang mental health problem nga gina-antos sang kada indibidwal ilabi na sini nga panahon sang pandemic. 

Ini nga pahayag ni Vargas ang kasunod sang padayon nagasaka nga kaso sang suicide sa siudad.

Kahapon, isa ka 30 anyos nga lalaki ang nag-suicide paagi sa paglumpat gikan sa ikaapat nga panalgan sang isa ka mall diri sa siudad sang Bacolod.   | Aksyon Dorel Cabatu

MORE STORIES:

LIKE US ON FB

error: Ooops... You are not authorized to copy this content.