KAPIN 1,500 KA MGA MIGRATORY WORKER NATALANA NGA MAG ABOT SA NEGROS OCCIDENTAL

Share on facebook
Share on google
Share on pinterest
Share on twitter
Share on print

Padayon ang pag-abot sang mga migratory sugar workers sa probinsya sang Negros Occidental agud magtrabaho sini nga galing ukon milling season.

Sa pinakahulihi nga datus, yara na sa 3,110 ka mga migratory workers ang nag-abot kag gindala na sa nagkalain-lain nga hacienda sa banwa sang Isabela, syudad sang Kabankalan, Silay, Talisay kag mga lugar kun sa diin malapad ang katubuhan.

Suno kay Provincial Disaster Management Program Division Head Dr. Zephard Caelian, ginalauman nga may maga-abot pa nga 1, 500 ka mga migratory workers.

Biernes nga adlaw sang may nag-abot nga 40 ka mag migratory workers gikan probinsya sang Aklan.

Pagpaathag ni Caelian ang tanan nga mga migratory workers ang ginapaidalom sa swab test antis pa man pahanugutan nga makatrabaho.

Nahibaloan nga sa una nga batch sang pag-abot sang mga migratory sugar workers may 13 tanan ka mga nagpositibo sa balatian. | Aksyon John Diaz

NEGROS OCCIDENTAL MAY 118 ACTIVE COVID-19 CASES

Liwat nga nagsaka ang kaso sang Covid-19 sa Negros Occidental.

Sa datos sang Provincial Incident Management Team (PIMT) tubtub Enero 17, 2021, nagsaka sa 118 ang active cases halin sa 109 nga record sadtong Enero 11, 2021.

Ang syudad sang San Carlos amo ang may pinakadamo nga active cases nga may 23 kag ginasundan sang Silay nga may 13.

May 24 naman ka mga banwa kag syudad ang may single-digit number na lamang nga active cases.

May lima man ka mga banwa nga wala na sang aktibo nga kaso nga ginalakipan sang Don Salvador Benedicto, Cauayan, Pontevedra, San Enrique, kag Valladolid.

Pinakanubo nga active cases ang narekord sang PIMT sadtong Enerto 6 kag 9, 2021, nga may 104.

Basi sa cumulative report sang PIMT halin Marso 27, 2020 tubtub Enero 17, 2021, ang Negros Occidental ang may total Covid-19 cases nga 6,574, recoveries – 6,250, kag 206 nga napatay. | Aksyon Marlon Genovea

BARANGAY 18 MAY ARKILAHAN NGA LUGAR PARA TEMPORARY SHELTER SANG MGA WATCHER

Arkilahan sang Brgy. 18 council ang isa ka bakante nga lokal agud himuon nga temporary shelter para sa mga watchers sang mga pasyente sang Corazon Locsin Montelibano Memorial Regional Hospital (CLMMRH).

Ang arkilahan nga lugar ang nahamtang sa 2nd Cordova Road, Brgy. 18 syudad sang Bacolod kag may kadakuon nga 12×50 square meters.
Suno kay Kapitan Madeline Diaz sang Barangay 18, isa ka indi magpakilala nga indibidwal ang nagpakig-angut sa iya agud magbulig sa mga watchers pinaagi sa paghatag sang libre nga ilistaran.

Magapahamtang man sang 50 ka mga folding beds kag ulunan ang barangay agud indi na mabudlayan pa nga magpangita sang gamit ang mga watchers.

Dugang pa ni Diaz, wala labot sang bulig pinansyal magahatag man sang duha ka sako sang bugas ang nagdonar.

Nagalaum si Diaz nga magkooperar kag mangin responsable ang mga watchers. | Aksyon John Diaz

MORE STORIES:

LIKE US ON FB

error: Ooops... You are not authorized to copy this content.