ISOLATION FACILITIES SA PROBINSYA AMAT-AMAT NGA NAGAKAPUNO

Share on facebook
Share on google
Share on pinterest
Share on twitter
Share on print

Amat amat naman nga nagakapuno ang mga ‘isolation facilities’ sang gobyerno probinsiyal, bangud sa liwat nga pagdamo sang kaso sang Covid-19.

Suno kay Provincial Administrator Atty. Rayfrando Diaz II, nga sa record sang Provincial Incident Management Team Abril 5, 2021, naglab-ot na sa 488 ang aktibo  nga kaso sa diin ang San Carlos City amo ang  may pinakadamo nga may  140. Dugang pa ni Diaz,  madamo sa karon sang mga empleyado sang gobyerno nga nagpositibo sa Covid-19 kag  napaidalom sa ‘isolation’  upod ang ila pamilya  sa Mambucal Resort, banwa sang Murcia.

Ini ang ginalakipan sang 6 ka mga doktor sang Teresita L. Jalandoni Provincial Hospital, isa ka senior medtech  nga nakadestino sa molecular laboratory, kag  isa ka Covid-19 swabber sang Provincial Health Office.

May 4 man ka staff sang municipal treasurer’s office sang Isabela  kag 2 ka empleyado sang DepEd Murcia ang naka quarantine man sa Mambucal. 

Suno pa kay Diaz, may 2 na lamang ka mga kuarto  ang bakante sa Mambucal bilang ‘isolation room’. | Aksyon Marlon Genovea

PRIMARY SUSPECT SA MASSACRE GIN-AKO ANG KRIMEN

Gin-ako sang primary suspect nga si Christian Tulot nga siya ang nagpatay sa apat ka miembro sang pamilya sa Gardenville Subdivision, syudad sang Bacolod nagligad nga Abril 4.

Si Tulot ang naghimo sang extra judicial confession kag iya ini ginpalayag sa atubangan sang iya abogado, kapulisan kag katapo sang media subong nga hapon, Abril 10.

Suno kay Tulot, ang konsensya amo ang nagduso sa iya para akuon ang krimen.

Ginpakita sang kapulisan ang martilyo kag espading nga gin usar sa krimen kag ini ang gin ako sang suspek.

Gin ako man sang suspek nga iya man gindala sa iya gintiniran sa Barangay Bunga, Don Salvador Benedicto ang mga cellphone, kag iban nga gamit nga iya ginkuha.

Abril 4 sang natabo ang krimen pero Abril 7 sang natukiban sang kapulisan.

Ginkilala ang mga biktima amo sanday John Michael Espinosa, Jocelyn Nombre Espinosa, , Gemma Espinosa kag ng anum ka tuig nga si Precious Espinosa.

Nagpangayo sang pasensya si Tulot sa pamilya sang mga biktima kag sa Ginoo bangud sa krimen nga iya ginhimo.

Nagpangayo man sang pasaylo si Tulot sa kapulisan, sa publiko kag sa media bangud sa iya pagbinutig.

Ginalantaw sang kapulisan nga ang paghatag sang extra judicial confession ni Tulot ang bangud nga nagtahaw na ang epekto sang iligal nga droga.

Ginpahayag ni Police Major Joery Puerto, hepe sang Police Station 8, nga sa Lunes nga adlaw ila ipasaka ang kaso nga multiple murder with robbery batuk kay Tulot.

Para kay Puerto, napukaw ang suspek sa iya nga konsensya kag naserbe na ang hustisya.

Kaina sang hapon, sang gin lubong na ang mga biktima sa Bacolod Memorial Park.

HANAY SANG NEGOSYANTE PABOR NGA IPAIDALUM SA GCQ ANG PROBINSYA

Kumporme ang mga negosyante nga ipaidalom sa General Community Quarantine kag pagligwat sang gurfew hours nga ipatuman sa probinsiya sg Negros Occidental. 

Sa interview sg Aksyon Hotline kay Metro Bacolod Chamber of Commerce and Industry chief executive Frank Carbon, nalipay sila kag ila gina abi-abi ang ginpatuman nga solusyon ni Governor Eugenio Jose Lacson kag sang mga alkalde sang kada banwa kag syudad.

Dugang pa ni Carbon, gamay lang ang epekto kon temprano pa magasira ang mga negosyo bangud  makabawi man kon aga.  Palayag ni Carbon, dyutay gid lamang ang adjustment kag kinalain sang mga pagsulundan kon napaidalom ang lugar sa MGCQ ukon GCQ. 

Suno kay Carbon, panahon na nga pahanugutan ang local IATF nga magdesisyon sang para sa ila mga nasakupan bangud sila ang mas nakahibalo sg dapat kag mga kinahanglanon sang mga pumuluyo. | Aksyon Eden Aboso

MORE STORIES:

LIKE US ON FB

error: Ooops... You are not authorized to copy this content.