Isa ang patay kag isa ang pilason matapos gintiro ang mga biktima sa sulod sang balay sa Purok Tilapia Barangay 3 syudad sang Bacolod kaina sang aga, Hwebes.
Ang mga biktima ginkilala kay Melchor Chavez, 40 anyos kag pumuloyo sang Purok Lubi Barangay 3 kag Lordie Jarobete pumuloyo sang Barangay 34.
Patay si Chavez nga may igo sang luthang sa ulo samtang kamot naman ang igo ni Jarobete nga padayon ginabulong sa Corazon Locsin Montelibano Memorial Regional Hospital. Suno kay Police Capt. Leo Estopa, hepe sang Police Station 2 ginsulod sang isa ka persona ang balay ni Chavez kag gilayon gintiro gamit ang calibre 45.
Nasalabat sang bala si Jarobete nga nataboan nga yara man sa sulod sang balay ni Chavez. Suno kay Estopa, naga-kalo kag naka-jacket nga naka camouflage nga delargo ang persona nga nagtiro sa biktima.
Matapos sang insidente gilayon nagpalagyo ang suspetsaso sakay sa puti nga van.
Narekober ang tatlo ka basiho sang calibre 45 samtang yara sa kustodiya sang Police Station 2 ang duha ka testigo nga nataboan sang insidente.
Suno kay Estopa wala sang record sa drugs ang mga biktima sa diin gina-usisa pa nila ang motibo sang nasambit nga insidente. | Aksyon Eric Magbanua