ISA PATAY, APAT PILASON MATAPOS NAKABUNGGO ANG JEEP SA TRUCK NGA NAKA PARKING SA KILID DALAN SA BARANGAY GRANADA

Share on facebook
Share on google
Share on pinterest
Share on twitter
Share on print

Patay ang isa ka mekaniko kag pilason ang apat ka iban pa nga persona sa aksidente sa nagluntad sa Granada-Alangilan Road, Bangga Carmen, Brgy. Granada syudad sang Bacolod, Lunes sang gab-i, Nobiembre 2.

Ang napatay ginkilala kay Lory Fernandez, 56 anyos.

Suno sa imbestigador sang Police Station 5 nga si Police Corporal Rodel Belarde, gikan sa isa ka pagtililipon sa Brgy. Alangilan kag papauli na sa Granada Heights Subdivision, Brgy. Granada sanday Fernandez kag ang pamilya sang manak sini sang nabungguan ang isa ka truck nga nagaparada sa kilid sang dalan.

Si Fernandez ang nagapungko sa passenger side sang depasahe nga jeep kag nadugayan pa antis nakuha matapos nga naipit.

Patay si Fernandez matapos makaangkon sang madalom nga pilas sa ulo kag iban pa nga bahin sang iya lawas.

Nakaangkon naman sang lasgas ang driver sang jeep nga si Joshua Araujo, 26 anyos, sang Granada Heights Subdivision, Brgy. Granada syudad sang Bacolod.

Pilason man ang asawa kag duha ka mga kabataan ni Araujo.

Sa interview sang Aksyon Radyo Bacolod kay Araujo, wala sini nakit-an ang nagaparada nga truck sa kilid sang dala bangud wala ini sang early warning device.

Aligasyon naman sang driver sang truck nga si Jose Maria De Ocampo, 65 anyos, sang Hda. Carmen, Brgy. Granada syudad sang Bacolod, nagbutang ini sang early warning device antis ginbilin ang salakyan.

Dugang pa ni De Ocampo, ginpahibalo na lamang siya nga nabungguan na ang iya salakyan.

Pagpahayag pa ni De Ocampo nga ini ang pinaka-una nga higayon nga nagpark ini sa amo nga lugar bangud nga ini ang manyapon pa kun tani sa ila balay antis magpadulong sa emission center sa syudad.

Ang driver sang truck ang yara karun sa kustodiya sang Police Station 5 samtang nagapadayon ang imbestigasyon. | Aksyon John Diaz

MORE STORIES:

LIKE US ON FB

error: Ooops... You are not authorized to copy this content.