Isa patay, apat ang pilason matapos nag bunggo ang Mitsubishi canter truck sa abandonado nga balay sa Sitio Docog-docog, Brgy. Rizal, syudad sang San Carlos mga las 4:15 kaina sang hapon, Agusto 12.
Sa report ni Aksyon Stephen Presquito, ang truck ang may walo tanan ka sakay lakip na ang driver kag gin alegar nag malfunction ang preno sa dulhugon kag kurbada nga bahin sang dalan nga amo ang gin tunaan sang aksidente.
Gin kilala ang napatay nga si Jimmy Javenes, 30 anyos, residente sang Guadalupe, Cebu City.
Nakaangkon naman sang pilas ang mga biktima nga sanday Jaime Buyan, 35 anyos, taga Bohol, Reynaldo Sotil, 35 anyos taga Bohol, Roland John Libra, 29 anyos sang Cebu City, kag ang driver nga si Elicio Ancajas, 55 anyos sang Cebu City.
Luwas sa katalagman tatlo ka iban pa nga sakay sang canter.
Ang truck ang kargado sang apat ka generator sets kag iban pa nga gina panag-iyahan sang isa ka telecommunication company.
Ang mga biktima ang gikan sa Capiz, nag byahe pa San Carlos City kag padulong kuntane sa Cebu. Sa karon, gina-verify pa sang newsteam ang pinakaulihe nga medical bulletin sang mga biktima.
Suno kay Staff Sgt. Rochester Batojan, traffic investigator sang San Carlos PNP, paga sabton sang kompaniya ang tanan nga gasto sa hospital sang mga biktima. | Aksyon Stephen Presquito, Aksyon Dale Salazar
