Maga patigayon sang inspection ang Bacolod Permits and Licensing Division sa masunod nga semana kon bala naga sunod ang mga establisamento sa mga health protocol nga gin isyu sang gobyerno nasyunal.
Suno kay Permits and Licensing Division Head Stela Rose Rayos, prayoridad sang ila talatapan nga i-inspect ang mga Salons, Barber Shops kag mga restaurants para masiguro nga naga comply ang mga ini sa health protocol.
Dugang pa ni Rayos, ang ila inspection ang ma base sa health protocol nga gin isyu sang DTI kaangay sang pag suksok sang facemask sang mga empleyado, pag butang sang footbath, kag 50% ang ma akomodar sa salon kag barbershops.
Sa tion nga may bayolasyon, suno kay Rayos, maga isyu ang ila talatapan sang first kag second notice kag kon indi mag sunod, maga sumiter sila sang rekomendasyon sa City Legal Office.
Subong nga semana, nagwa man ang inspection team sang syudad angut sa reklamo nga may pila ka mga negosyo nga naga operate pero wala sang business permit. | Aksyon Dale Salazar