Ginklaro ni Hinigaran Mayor Nadie Arceo nga luyag lamang niya maathagan ang isyu nga ginatalakay sang radio blocktimer nga si Larry Concepcion sa Radyo Natin Hinigaran.
Ini ang sabat sang alkalde sa reklamu may kaangtanan sa gina alegar, pagsulong niya sa estasyon sang radyo upod ang bodyguard sadtong Martes sang hapon Abril 16.
Suno sa alkalde, iya nga grupo amo ang may permiso nga makapangampanya sa plaza publika sang banwa sa Mayo 11, kag indi ang iya kasumpong.
Suno pa sa iya, ini ang madugay na nga ginahimo sa banwa, sa diin ang administrasyon amo ang masami nga nagagamit sang plaza bilang venue sang katapusan nga kampanya.
Dugang pa sang alkalde, indi siya luyag nga patalangon ang mga tawo ilabi na ang mga supporters sang naga engkuwentruhanay nga grupo, bangud posible nga ini ang halinan sang kinagamo.
Suno pa sa alkalde wala man siya nagpahog kay Concepcion, kundi luyag lamang sini nga maklaruhan kun anu ang kamatuoran. | Aksyon Marlon Genovea