Pagausisaon sang kapulisan ang tatlo ka numero nga nagtawag sa hotline number sang Public Attorney’s Office kag nagpabalo nga may bomba sa sulod sang Hall of Justice.
Suno kay Police Station 2 Officer-In-Charge Lt. Andy Ofalia, las 8 sang aga, Abril 6 sang ila nabaton ang report angut sa bomb threat.
Suno sa clerk nga nakasabat, lalaki ang nagtawag nga may bomba sa building rason nga gilayon niya ginpabalo sa iya mga kaupdanan kag sa iban pa nga empleyado agud maka gwa sa building.
Dugang pa ni Ofalia, gilayon man sila nakig-angot sa bomb squad agud makabulig sa pag pasiguro nga pagpamahog lang ang natabo kag wala sang matuod nga bomba.
Ginpalayag man ni Ofalia, nga ginatan-aw nila tanan nga anggulo sa rason sang bomb threat kag isa diri amo ang paghibalo kon may yara sang mga kilala nga personalidad nga may schedule sang hearing sa amo nga adlaw.
Naglambot sang malapit duha ka oras ang paglibot sang bomb squad kag canine sa gwa kag sulod sang Hall of Justice para masiguro nga wala sang bomba nga ginbutang bangud sa nabaton nga bomb threat.
Matapos ma clear ang lugar, balik sa pagtrabaho naman ang mga empleyado.
Pahanumdom sang otoridad sa iban pa nga opisina nga kon may mabaton nga kaangay nga mga pagpamahog, gilayon man nga makig-angot sa ila. . | Aksyon Eden Aboso