Nakalusot na sa Senate Committee on Health and Demography ang gina duso nga hagna ni Congressman Greg Gasataya nga naga tukod sang Bacolod City General Hospital.
Una nga gin aprubahan sang Kongreso ang House Bill 6731 nga gin author ni Gasataya samtang si Senador Juan Miguel Zubiri naman ang nag author sang counterpart bill sa Senado.
Suno kay Gasataya, una nga nag patigayon sang committee hearing si Senador Bong Go kag ini ang paga himuan sang committee report kag gina paabot nga matalakay sa second reading sa pag balik sang session sang Senado sa Nobiembre.
Dugang pa ni Gasataya, madugay na nga handum sang mga pumuluyo sang Bacolod nga makaangkon sang kaugalingon nga hospital ilabi na nga ang Corazon Locsin Montelibano Memorial Regional Hospital ang naga isahanon nga public hospital nga naga serbe sa mga pasyente sa Bacolod kag Negros Occidental.
Samtang, sa Nobiembre 9 naman maga balik ang session sang Kongreso. | Aksyon Dale Salazar
