GOV LACSON NANAWAGAN SA MGA RESIDENTE SANG SAN CARLOS CITY NGA MAGPABILIN SA BALAY KON WALA SANG IMPORTANTE NGA KALADTUAN

Share on facebook
Share on google
Share on pinterest
Share on twitter
Share on print

Nagapanawagan si Negros Occidental Governor Bong Lacson sa mga pumuluyo sa siudad sang San Carlos nga kun mahimo magpabilin sa ila mga puloy-an kun wala man sang importante nga kadtoan.

Sa interview sa Aksyon Hotline, ginpahayag sang Gobernador nga 164 na sa karun ang aktibo nga kaso sang COVID-19 sa siudad sang San Carlos. 

24 ang nadugang kahapon kag 21 diri ang nagikan sa isa lang ka lugar nga amo ang Barangay Guadalupe Proper. 

Direkta nga gin-abisohan sang Gobernador ang mga taga San Carlos ilabi na ang taga Barangay Guadalupe Proper nga magsunod sa health protocol.

Suno pa kay Lacson, apisar nga indi pa alarming ang kaso sa probinsya apang yara na sa 32% ang pinakamataas nga na-record sang COVID cases sang nag-umpisa ang pandemya.

Samtang, bukas naman si Lacson inkaso mag hingyo sang ECQ si San Carlos City Mayor Rene Gustilo bangud magadepende man ini sa gihapon sa na pag-review sang Regional IATF. | Aksyon Dorel Cabatu

17K NGA BALOR SANG SUSPECTED SHABU NAKUMPISKAR; SUBJECT SA BUY-BUST OPERATION, NAKAPALAGYO

Nakapalagyo ang subject sa buy-bust operation nga si Ronel Balaquet sa 1st Road Puentebella, Barangay Taculing syudad sang Bacolod, kaina sang hapon, Sabado.

Ang nakapalagyo ang nalakip sa drug watchlist sang Police Station 6 kag ginakabig street level individual.

Suno kay Police Major Leo Estopa, hepe sang Police Station 6, pila na ka reklamo ang ginpadangat batuk sa iligal nga aktibidad ni Balaquet.

Dugang pa ni Estopa, namutikan ni Balaquet nga pulis ang iya ka transaksyon kag nakapalagyo kasunod nga madamo sang exit ang ila compound.

Nabilin ni Balaquet ang isa ka pouch nga naga unod sang 10 ka sachet sang suspected shabu.

Kapin 17 mil ang balor sang ginapatihan shabu ang narekober sang Police Station 6.

PRIMARY SUSPECT SA MASSACRE GIN-AKO ANG KRIMEN

Gin-ako sang primary suspect nga si Christian Tulot nga siya ang nagpatay sa apat ka miembro sang pamilya sa Gardenville Subdivision, syudad sang Bacolod nagligad nga Abril 4.

Si Tulot ang naghimo sang extra judicial confession kag iya ini ginpalayag sa atubangan sang iya abogado, kapulisan kag katapo sang media subong nga hapon, Abril 10.

Suno kay Tulot, ang konsensya amo ang nagduso sa iya para akuon ang krimen.

Ginpakita sang kapulisan ang martilyo kag espading nga gin usar sa krimen kag ini ang gin ako sang suspek.

Gin ako man sang suspek nga iya man gindala sa iya gintiniran sa Barangay Bunga, Don Salvador Benedicto ang mga cellphone, kag iban nga gamit nga iya ginkuha.

Abril 4 sang natabo ang krimen pero Abril 7 sang natukiban sang kapulisan.

Ginkilala ang mga biktima amo sanday John Michael Espinosa, Jocelyn Nombre Espinosa, , Gemma Espinosa kag ng anum ka tuig nga si Precious Espinosa.

Nagpangayo sang pasensya si Tulot sa pamilya sang mga biktima kag sa Ginoo bangud sa krimen nga iya ginhimo.

Nagpangayo man sang pasaylo si Tulot sa kapulisan, sa publiko kag sa media bangud sa iya pagbinutig.

Ginalantaw sang kapulisan nga ang paghatag sang extra judicial confession ni Tulot ang bangud nga nagtahaw na ang epekto sang iligal nga droga.

Ginpahayag ni Police Major Joery Puerto, hepe sang Police Station 8, nga sa Lunes nga adlaw ila ipasaka ang kaso nga multiple murder with robbery batuk kay Tulot.

Para kay Puerto, napukaw ang suspek sa iya nga konsensya kag naserbe na ang hustisya.

Kaina sang hapon, sang gin lubong na ang mga biktima sa Bacolod Memorial Park.

MORE STORIES:

LIKE US ON FB

error: Ooops... You are not authorized to copy this content.