GOV LACSON NAG TURNOVER SANG 3.5M PARA SA PRDP NATIVE CHICKEN PRODUCTION PROJECT

20K NGA CASH GINALEGAR NAKUHA SA AHENTE NGA NA HOLDAP SA MURCIA

Nagdangat sa 20,000 pesos nga cash ukon koleksyon sang isa ka ahente ang nakuha matapos gin-alegar ginhold-up sa Brgy. San Miguel, banwa sang Murcia, Abril 17.

Ginkilala ang ahente nga si Kenneth Poblacion, 30 anyos kag residente sa syudad sang Silay.

Suno kay Police Major Marc Joel Reclamado, hepe sang Murcia PNP, ginpahayag sang ahente nga ginpalapitan ini sang tatlo ka persona nga nagasakay sa sports nga motorsiklo kag nagdeklarar sang hold-up.

Gilayon man ginhatag ni Kenneth ang bag sini nga may unod sang kwarta.

Base sa pagpamangkot sang kapulisan sa mga tag-iya sang tyanggi, wala man ang mga ini sang ideya angut sa insidente bangud wala man nakapangayo sang bulig ang biktima.

Sa karon padayon pa ang imbestigasyon sang kapulisan angut sa natabo.

CELL NO. 4 PAGATUKURON SA LANDFILL SANG BACOLOD

Magatukod ang syudad sang Bacolod sang sanitary landfill cell no. 4 sa Barangay Felisa, syudad sang Bacolod.

Ginkumpirmar ni Councilor Jude Thaddeus Sayson, chair sang committee on finance and appropriation, 59.2 milyones pesos ang pondo sa konstruksyon sang cell no. 4 sa propedad nga bag-o nga ginbakal sang LGU.

Ang IPM-Construction and Development Corporation amo ang magatukod sang cell no. 4.

Ginpahayag sang Konsehal, ginapaabot sini nga maglawig ang pag usar sang syudad sang cell no. 4 bangud may mga recycling facility nga pagatukuron sa amo man nga lugar.

Ginalantaw ni Sayson nga mapangitaan sang paagi sang syudad ang cell no. 1, 2, 3 nga posible pwede ma convert bilang isa ka park.

Samtang, magapabilin nga ang IPM-CDC ang maga dumala kag operate sang sanitary landfill sa syudad balor 63.9 milyones pesos halin Mayo 1, 2024 tubtob Disyembre 2024.

Nagdangat sa kabug-usan nga 123.2 milyones pesos ang pondo para sa cell no. 4 kag maintenance snag landfill.

Myerkules sang hapon, Abril 17, sang na ratify sang konseho ang mga kontrata.