Wala pa maka desisyon ang gobyerno sang syudad sang Bacolod kon ano ang matabo pagkatapos sang Enhanced Community Quarantine ukon ECQ pagkatapos sang Abril 30.
Sa interview sang Aksyon Radyo, gin pahayag ni Mayor Evelio Leonardia, may yara siya sang personal thoughts angut sini pero ang pag desisyon ang istoryahan sang kabilugan upod si Vice Mayor El Cid Familiaran, Congressman Greg Gasataya, mga konsehal kag iban pa.
Suno kay Leonardia, nag pakigangut sila sa DILG pero wala pa sang guideline nga nabaton gikan sa ahensya matapos nga gin-classify sang National IATF nga ang Bacolod ang makabig nga moderate-risk area.
Ang mga lugar sa idalum sang moderate risk area ang dapat mag patuman sang General Community Quarantine.
Suno kay Leonardia, madamo sang butang nga dapat ikonsiderar sa pag desisyon lakip na ang factor sa health, business, budget, legal aspect kag iban pa.
Para sa Alkalde, importante ang ikaayong lawas kag mas maayo nga mag sobra ang preparasyon sang syudad sang sa mag risgo.
Sa nahibaluan, ang syudad ang nag tukod sang Bacolod Exit Plannning Team nga amo ang maga tuon sa posible ano matabo sa Bacolod pagkatapos sang ECQ sa Abril 30.