Nagkuha na sang application form para sa Business Permit ang resort sa Barangay Pahanocoy, syudad sang Bacolod nga damlag lang ginpasira sang Bacolod Emergency Operations Center ukon EOC.
Suno kay Stela Rose Rayos, pamuno sang Permit and Licensing Office, sang Sabado nga adlaw sang nagkuha sang application form ang tag-iya sang resort kag nagpabutyag nga handa sila nga mag-comply sa mga requirement para sa business permit.
Dugang pa ni Rayos, sa tion nga ma-isyuhan na sang permit ang resort, ila pa ini iga-refer sa City Legal Office kag EOC.
Madumduman, una nga nagdepensa ang tagdumalahan sang resort nga ang gin patigayon nga blessing nagligad nga Enero 15 ang gintambungan lamang sang ila mga himata kag pamilya.
Pero sa bahin sang Bacolod EOC, ang resort ang nagpangayo sang permit sa Barangay nga magpatigayon sang blessing pero wala dire nalakip ang pagpatigayon sang foam party.
Sa nahibaluan, naglapta sa social media ang pila ka video clips sang foam party nga gin alegar nagabayolar sa minimum health standard. | Aksyon Dale Salazar
