GINIKANAN SANG NEGRENSE PMA 2021 TOPNOTCHER GINLARAGWAY ANG ILA ANAK NGA MABUOT, MATINUMANON KAG MAPISAN MAGTUON

Share on facebook
Share on google
Share on pinterest
Share on twitter
Share on print

“Himuon ko ang tanan para sa akon mga ginikanan.”

Ini ang mga tinaga nga masami ginapalab-ot ni Cadet 1CL Janrey Artus, ang nagtapos bilang Valedictorian kag Summa Cum Laude sang Philippine Military Academy MASALIGAN Class of 2021.

Si Artus ang ikatatlo sa apat ka mag-ulutod kag tumandok sang Purok Malipayon, Brgy. Guintuliran, banwa sang San Enrique.

Nagtapos si Artus sang iya high school sa Doña Hortencia Salas Benedicto National High School sa syudad sang La Carlota bilang Top 6 kag nakakuha sang pasidungog bangud sang iya kaalam sa mathematics.

Ginlaragway sang amay ni Artus nga si Florencio Artus, 62 anyos, isa ka retirado nga suldado, nga mabuot, matinumanon, kag mapisan sa pagtuon ang iya bata.

Suno sa amay, wala na ini natingala kun ngaa nanguna sa ila klase si Artus bangud nga nagasalig ini sa kaalam kag kapisan sang iya bata.

Suno naman sa iloy ni Artus nga si Jocelyn Artus, 62 anyos, kag isa ka retirado nga manunudlo sa elementarya, humalin elementarya tubtob sa kolehiyo ginpakita ni Artus ang iya katutom sa pagtuon.

Si Artus ang nag-eskwela sang kurso nga Bachelor of Science in Chemical Engineering sa University of the Philippines-Visayas apang tuig 2016 sang gin-ingganyo ini sang iya magulang nga isa man ka suldado nga magkuha sang examination sa PMA.

Nagduha-duha pa si Artus nga mag-untat sa pag-eskwela sa kurso nga Chemical Engineering agud magsulod sa PMA.

Tuig 2017 sang nagsulod sa PMA si Artus.

Suno sa iya iloy, wala man nagpakita sang kabudlayan si Artus samtang yara sa sulod sang PMA kag kun may nagakaigo nga tion nagatawag ini sa ila pinaagi sa telepono.

Si Artus ang ginalauman nga magapauli sa probinsya sang Negros Occidental sa ika-duha nga semana sang bulan sang Mayo.

Nahibaloan nga ginpili ni Artus nga magsulod sa Philippine Navy. | Aksyon John Diaz

VACCINATION KONTRA COVID-19 SA AYALA MALL NAG UMPISA NA

(Bacolod PIO Photo, May 8, 2021)

Ginkalipay ni City Administrator kag EOC Executive Director Em Ang nga nangin matawhay ang vaccination activity karon nga adlaw sa Ayala Mall.

Suno kay Ang, husto ang desisyon nga ginhimo sang EOC nga indi dapat pagtugutan nga maka pabakuna ukon akomodahon ang pila ka mga indibidwal nga wala maka pa rehistro ukon gina kabig nga mga walk in applicants.

Dugang pa ni Ang, ini na ang estratehiya nga ila paga gamiton umpisa sa masunod nga semana angut sa naga padayon nga vaccination program sang syudad.

Base sa plano sang EOC, yara lamang sa 200 ka mga indibidwal ang ila plano nga akomodahon kada adlaw para malikawan ang pag ginutok sang publiko ilabi na sa mga mall nga ila gin utilize bilang vaccination center. | Aksyon Art Tayhopon

SIKAT NGA SUBA SA KAPITAN RAMON, SILAY CITY TEMPORARYO NGA GINPASIRA

(Lexplorations PH FB Page | Algene Bacotod Photo)

Temporaryo nga ginpasira sang LGU sang syudad sang Silay ang suba sa mga pangayaw sa Sitio Lupa, Barangay Kapitan Ramon, Silay bilang precautionary measure kontra Covid-19.

Sa interview sang Aksyon Radyo, ginpahayag ni Silay Mayor Mark Golez, ang ini nga tikang nag base man sa ordinansa sang syudad nga nagadumili sa mass gathering ukon pagtililipon.

Dugang pa ni Golez, ini ang inisyatibo man sang syudad kasunod nga narecord ang anum ka Covid-19 cases sa Kapitan Ramon bisan nga malayo na ini nga lugar.

Subong nga adlaw, Sabado, Mayo 8, sang nag umpisa ang temporary closure sang suba.

Base sa impormasyon ni Golez, 2 mil tubtob 3 mil ka mga tawo ang nagapadulong sa lugar kag iban sa ila ang gikan pa sa Kabankalan kag San Carlos.

Ginpahayag sang Alkalde, nga iya na gintugyanan ang Silay PNP nga magpahamtang sang checkpoint sa dalan padulong sa suba.

MORE STORIES:

LIKE US ON FB

error: Ooops... You are not authorized to copy this content.