Maga file si City Councilor Wilson Gamboa Jr sang resolusyon nga nagapangabay sa Bacolod City Police Office nga maghimo sang aksyon sa wala masolbar kag sunod-sunod nga insidente sang pagpangluthang sa syudad.
Subong nga bulan sang Pebrero, anum ka mga persona ang napatay sa separado nga mga shooting incidents sa Bacolod.
Sa interview sang Aksyon Radyo, ginpahayag ni Gamboa, indi na isolated ang ini nga mga kaso kag ini ang maka-alarma kasunod nga may mga ginatiro na sa sulod sang balay kaangay sa natabo sa Barangay 2 kag Barangay Cabug.
Suno kay Gamboa, sadto nakapasar na ini sang resolusyon nga nagapangabay sa BCPO sang imbestigasyon sa mga pagpamatay sa mga ‘high-profile individual’ apang nagapahayag nga wala sila nahatagan sang update sang kapulisan.
Ginakwestiyon ni Gamboa nga kon indi masolbar sang kapulisan ang mga kaso sa pagluthang sa mga kilala nga indibidwal, ano pa gid ayhan ang mga ordinaryo nga tawo.
