Wala sang kamatuoran nga may ipatuman nga lockdown sa syudad sang Bacolod karon nga holiday season.
Ini ang pagklaro ni Vice Mayor El Cid Familiaran, chair sang Bacolod IATF, matapos ang naga lapta nga sala nga impormasyon nga lockdown sa syudad.
Sa interview sang Aksyon Radyo Bacolod, gin pahayag ni Familiaran, nga wala sang basehan para ipatuman ang lockdown sa syudad bangud padayon sa karon nga naga nubo ang Covid-19 cases.
Gina kabig ni Familiaran, nga ini ang fake news, kag indi maayo nga hilikuton nga naga patalang sa tawo.
Suno sa Bise-Alkalde, ini ang seryoso nga butang ilabi na nga yara karon sa crisis ang syudad nga naga tuga sang anxiety sa publiko ilabi na sa mga negosyante kag mga may trabaho.
Na obserbaran ni Familiaran, nga wala man ini naga katabo sa iban nga LGU kundi sa Bacolod lamang.
Suno sa Bise-Alkalde, may yara lamang sang moratorium sa mga Locally Stranded Individual ukon LSI humalin Disyembre 21, 2020 tubtob Enero 3, 2021 sa tuyo nga mahatagan sang tion ang mga frontliners nga makapahuway matapos ang 9 ka bulan nga pakig-away kontra Covid-19. | Aksyon Dale Salazar