Patay ang pasahero sang trisikol sa aksidente nga natabo sa dalan circumferential sakop sang Mt. Carmel Subdivision, Barangay Alijis, syudad sang Bacolod, Martes sang gab-i, Disyembre 22.
Ang napatay ginkilala sa kay Prince Joaquin Relatos, 23 anyos kag pomuluyo sa Mt. Carmel Subdivision, Barangay Alijis, syudad sang Bacolod.
Pilason naman ang driver sang tricycle nga si Wilmar De Asis, 27, residente sang Purok Pedrosa, Barangay Alijis.
Sa interview sang Aksyon Radyo sa gwardiya sang subdivision nga ginkilala sa kay Randy Saranillo, gin alegar nga tatlo ka salakyan ang imbolbado, ang trisikol nga ginsakyan ni Relatos, isa ka pribado nga salakyan kag truck nga kargado sang tubo.
Panaysayon sang guwardiya, gin alegar gin –hit and run sang pribado nga salakyan ang trisikol nga maliko kuntane sa subdivision kag nag-timing lamang ang paglabay sang truck nga tuhay naman ang direksiyon, nga amo ang ginderitsuhan sang trisikol.
Padayon pa ang pagpangusisa sang kapulisan sa dugang nga impormasyon sa aksidente.
Samtang, ginpahayag ni Edna, iloy sang biktima, nga subong kuntani ang katapusan nga semana sa training sa trabaho sang iya bata.
Suno sa Iloy, napabalo pa siya sang iya bata nga papuli na ini antes natabo ang aksidente.
Ang biktima ang nag gradwar sa kolehiyo sa kurso nga Bachelor of Science in Civil Engineering sa UNO-R subong nga tuig.
Siya ang ikaduha sa tatlo ka mag-ulutod.
Naga panawagan ang pamilya Relatos sa driver sang pribado nga salakyan nga mag sungka sa kapulisan. | Aksyon Ann Defensor, Aksyon Dale Salazar
