Pilas sa ulo ang naangkon sang isa ka empleyado nga na-asign bilang Law Enforcement Team sa syudad sang San Carlos matapos nga gin wasay sang gin alegar may diperensya sa paminsaron.
Nagluntad ang insidente sa V. Gustilo Street, Barangay V, syudad sang San Carlos mga las 2 kaina sang kaagahon, Mayo 12.
Ang pilason ginkilala kay Rolly Paalisbo, 46 anyos kag nagapuyo sa San Juan Tunga sa amo man nga Barangay, samtang ang suspetsado ginkilala naman kay Bernie Unlagada, 34 anyos.
Suno kay Major Mark Angelo Junco, hepe sang San Carlos PNP, nagrespondi ang biktima sa lugar matapos nakabaton sang impormasyon nga may naga-wild nga tawo kag may bitbit nga wasay, apang pag-abot sini gilayon siya nga ginwasay sang suspetsado kag na igo sa ulo.
Dugang ni Junco, nagrespondi man gilayon ang kapulisan sa lugar sang insidente, pag-abot sang otoridad ginlagas sini si PCPL Allyn Estrao miyembro sang San Carlos PNP, rasun nga napilitan sila nga luthangon ang suspetsado kag naigo sa duha ka paa.
Ang suspetsado ginabulong karun sa hospital, kag pasakaan sang kaso nga direct assault kag physical injury.
Ang suspetsado ang may gina-inom nga bulong para sa iya utok. | Aksyon Bryan Morden
