Ginkuwestyon ni Provincial Legal Office Book Binder III Warlito Butalon ang termination order nga ginpapanaog kontra sa iya.
Sa interview sang Aksyon Radyo, ginsiling ni Butalon nga wala mag-agi sa ensakto nga proseso ang reklamo batok sa iya, kundi nagdiretso lamang sa termination, matapos siya ang una nga ginpaidalom sa suspension.
Suno kay Butalon, magasumiter siya sang motion for reconsideration sa Provincial Legal Office sa masunod nga semana, kag plano nga mag-apelar sa Civil Service Commission.
Si Butalon ang isa lamang sa walo ka mga empleyado sang gobyerno probinsiyal nga ginsuspender, bangud sa ginpasaka nga reklamo.
Ang reklamo kay Butalon ang may kaangtanan sa gin-alegar kapaslawan sa pagreport sang actual nga oras sang trabaho.
Dugang pa ni Butalon, ini ang una nga tion nga siya ang ginreklamo sa sulod sang 27 ka tuig nga pagtrabaho bilang empleyado sa kapitolyo.
Siya ang nagaserbe man bilang liason officer kag driver sang Provincial Legal Office. | Aksyon Marlon Genovea