Gin-appoint ni Presidente Rodrigo Duterte si Bacolod Mayor Evelio Leonardia bilang myembro sang Legislative – Executive Development Advisory Council (LEDAC) sang ika-18nga kongreso.
Ang presidential appointment ang napetsahan Setyembre 23 kag nabaton ni Leonardia sadtong Oktubre 1.
Si Leonardia ang tiglawas sang tanan nga lokal nga panguluhan sa board kag naga isahanon nga lokal nga opisyal nga gin appoint sa LEDAC.
Lakip sa mga myembro sang LEDAC amo ang Bise Presidente, Senate President, Speaker of the House kag pito ka mga Cabinet Secretaries nga gin pili sang Presidente.
Ang LEDAC ang pinakataas nga consultative kag advisory body nga gina bug-usan sang 20 ka mga myembro kag ang Presidente amo ang naga pungko bilang chairman.
Sa press statement, naga laum si Leonardia nga iya matuman ang gina paabot sa iya sang Presidente kag ma serbisyuhan ang interes sang tanan nga local government units sa bug-os nga pungsod.
