Duha ang patay kag duha ang pilason sa shooting incident nga nagluntad sa Purok BM, Barangay Taculing syudad sang Bacolod, subong nga gab-i, Sabado.
Dead on the spot si Denmar Suspene, 20 anyos kag nagatrabaho sa isa ka telecommunication company.
Suno kay Patricio Suspene, amay sang napatay, naga-inum-inum sila sa ila balay upod ang suspetsado nga ginkilala kay Thomas Lovino, legal ang edad, kag residente sang amo man nga lugar.
Samtang naga-inum-inum naghapit makadali sa ila balay si Noel Canencia, 53 anyos, kag gilayon man nga nagpauli.
Nakibot si Suspene nga nagbalik si Canencia nga may bitbit na nga binangon kag gulpi nalang gintayaan si Lovino kag ginpahog nga patyon.
Nagbunot naman sang armas-luthang si Lovino kag gintiro si Canencia igo sa iya nga lawas.
Gintambagan sang mag-amay nga Suspene si Lovino apang mahimo aksidente sini nga natiruhan si Dean Mar igo sa iya nga agtang kag naulamid ang duha ka iban pa nga persona nga yara sa lugar sang nagluntad ang krimen.
Ginhingagaw pa dala sa ospital si Canencia apang gindeklarar nga dead on arrival.
Ang iban pa nga pilason amo nanday Ranyel Canencia, 23 anyos kag Ronnie Cabatbat, 51 ang edad.
Ginpahayag ni Police Station 6 Commander Police Captain Elmer Bonilla, may dugay na nga lainay sang buot si Lovino kag Canencia.
Suno kay Bonilla, nag-atubangay na ang mga ini sa barangay bangud sang pila ka personal nga problema.
Narekober sa lugar sang krimen ang mga basiyo sang bala sang kalibre-45 nga armas-luthang.
Antis magpalagyo, nagpangayo pa sang pasaylo si Lovino sa amay nga Suspene.
Padayon karun ang hot pursuit operation sang mga kapulisan batuk kay Lovino.
Si Lovino ang magapangatubang sang kaso nga two-counts of murder.| Aksyon John Diaz