Madasig ang padalagan, ini ang inisyal nga imbestigasyon sang Sagay PNP sa nagluntad nga pagbungo-anay sang duha ka motorsiklo nga nagresulta sa pagkapatay sang duha kag pilason man ang duha pa nga mga sakay sini sa Purok San Jose, Barangay Poblacion 2, Syudad sang Sagay.
Suno kay PMaj Albert Sy, hepe sang Sagay PNP, magluwas nga madasig ang padalagan, posible man nga naka-inom ang mga ini sang makahulobog nga ilimnon basi sa naguwa nga pagpangusisa.
Dugang ni Sy, medyo madulom man ang lugar nga ginluntaran sang aksidente, apisar nga may poste sang suga.
Nahibal-an sa sini nga aksidente, patay sanday Adan Pesanon, pumoloyo sang Barangay Bunga, banwa sang Don Salvador Benedicto kag Jerson Delagao angkas sa isa ka motorsiklo kag nagapuyo naman sa Barangay Poblacion 2, Syudad sang Sagay.
Padayon naman nga ginabulong sanday Rejohn Menguez ang driver kag ang isa pa nga angkas sini nga si Noel Maranon tanan nagapuyo man sa Barangay Poblacion 2, sa amo man nga Syudad. | Aksyon Bryan Morden