DUHA MISSING SANG GIN ANOD SA SUBA, 26 GIN EVACUATE MATAPOS ANG MABASKOG NGA ULAN SA BACOLOD

Share on facebook
Share on google
Share on pinterest
Share on twitter
Share on print
(Suba sakop sang Purok Kahirop B, Barangay Mansilingan, syudad sang Bacolod)

Ipadayon buwas nga adlaw ang search and rescue operation sa 19 anyos nga lalaki matapos gin-anod sang daludo sang tubig sa suba nga sakop sang Brgy. Vista Alegre syudad sang Bacolod.

Ang gin-anod sang suba ginkilala kay Jet Castillo, 19 anyos kag residente sang amo man nga lugar.

Suno kay Executive Assistant Jomarie Vargas, nagapamunit sa suba si Castillo upod ang tatlo ka iban pa nga lalaki sang gulpi nalang nga nagbaskog ang current kag nagtaas ang lebel sang tubig.

Nakaluwas ang tatlo ka mga kaupdanan ni Castillo.

Gin-usoy sang mga rescuer sang Bacolod City Disaster Risk Reduction Management Office ang suba nga konektado padulong sa Magsungay Bridge apang wala nila nakit-an si Castillo.

Nagapangayo sang bulig ang pamilya sang isa ka 56 anyos nga lalaki matapos siya ang gin-anod man sang baha sa suba nga sakop sang Purok Kahirop B, Brgy. Mansilingan syudad sang Bacolod.

Ang naanod ginkilala kay Rico Mirasol Sr residente sang amo man nga lugar.

Sa interview sang Aksyon Radyo Bacolod kay Rico Mirasol Jr, nagalantaw ang iya amay sang daludo sang tubig sa suba kaupod ang mga pamatan-on sa lugar.

Naglangoy si Mirasol padulong sa pika-pika sa likod sang ila puluy-an apang sang nagtingwa ini nga magbalik paagi sa paglangoy pakadto sa ginatindugan sang mga tawo, gin-anod ini sang baha.

Aminado si Mirasol nga nakainum ang iya amay sang natabo ang insidente.

Nagtinguha pa nga masalbar gilayon si Mirasol apang bangud sang daludo sang tubig wala na ini matabangan.
bwas nga adlaw magapadayon ang pamilya kaupod ang rescue team sang City Disaster Risk Reduction Management Office (CDRRMO) sa pagpangita kay Mirasol.

Gin-evacuate naman ang 26 ka mga persona matapos nagtaas ang lebel sang tubig sa pila ka bahin sang syudad.

Suno kay Vargas, ang 26 ka mga persona ang nagatinir sa flood prone areas kag karun yara na sa evacuation center sa Gonzaga Gym, Purok Gonzaga, Brgy. Taculing syudad sang Bacolod.

24 ka mga persona nga nagatinir sa kilid sang suba kag idalom sang taytay sa likod sang Bacolod Memorial Park ang gilayon nga gin-evacuate matapos nga magtaas ang lebel sang tubig sa suba.

Samtang, duha naman ka mga persona nga nagatinir sa kilid sang suba malapit sa boundary sang Brgy. Alijis kag Taculing ang gin-rescue.

Nag-umpisa ang pagbubo sang madamol nga ulan takna las 3 sang hapon kag nagsubside ang baha takna las 4:30 sang hapon.

Suno kay Vargas ang daludo sang tubig gikan sa nabukid nga bahin sang probinsya ang nagtuga sang pagbaha sa syudad sang Bacolod. | Aksyon John Diaz

MORE STORIES:

LIKE US ON FB

error: Ooops... You are not authorized to copy this content.