Duha ka separado nga enkwentro ang nag luntad sa tunga sang tropa sang 62nd Infantry Batallion batuk sa New People’s Army sa isla sang Negros subong nga adlaw, Septembre 17.
Suno kay Major Cenon Pancito III, spokesperson sang 3rd Infantry Division (3ID), ang una nga enkwentro ang nag luntad takna las 11:45 sang aga sa Sitio Anatuling, Brgy. Budlasan, Canlaon City, Negros Oriental.
Naglawig sang lima ka minutos ang enkwentro antes nga nag palagyo ang pito ka mga gina patihan myembro sang Communist NPA terrorist.
Nakuha sang militar ang pila ka war materials lakip na ang isa ka Cal. 45 mm Pistol, isa ka Cal. .22 mm revolver, magazine, mga bala, lima ka mga backpack nga may mga dokumento kag medical paraphernalia.
Suno kay Pancito, takna las 3:20 sang hapon sang may nag luntad man nga enkwentro sa Sitio Amian Brgy. Tan-awan, syudad sang Kabankalan sa tunga sang 302nd brigade personnel kag gina patihan Communist NPA terrorist.
Suno kay Pacito, iya pa gina hulat ang report angut sa mga na rekober sa ikaduha nga enkwentro.
Wala sang may nasamaran sa bahin sang militar.