Nagpasakop sa Young Southeast Asian Leaders Initiative (YSEALI) Regional Workshop on Good Governance and Civil Society si Sangguniang Kabataan Chair Shaine Solidum sang Barangay Villamonte, syudad sa Bacolod nga gin organisar sang U.S Embassy sa Kuala Lumpur kag TechSoup.
Masobra 700 ka mga pamatan-on nga lideres gikan sa nagkalain-lain nga pungsod sa South East Asia ang nag apply apang 100 lamang ka mga delegado ang napilian.
Magluwas kay Solidum, nakapasakop man sa sini nga aktibidad si Himamaylan City Vice Mayor Justin Gatuslao.
Suno kay Solidum, ang workshop ang patigayunon kuntane sa Malaysia nagligad nga Oktubre 2020, apang wala ini nadayun bangud sa Covid-19 pandemic, sa baylo, ini ang nadayun paagi sa virtual workshop bangud man sa pamahog sang bag-o nga Covid variant.
Ginpaathag ni Solidum, lakip sa ila gintalakay amo ang maayo nga panggobyerno, civic engagement kaangay sang open data tools, activism, public policy, transparency, procurement process kag iban pa.
Dugang pa ni Solidum, ang mga natun-an sini sa workshop ang iya na gin-propose kay Punong Barangay Romel Flores partikular na ang pag introduce sang good governance kag digital tools sa pagpadumala sang Barangay. | Aksyon Dale Salazar