DUHA KA MGA SUSPEK NGA NAKUHAAN SANG ARMAS LUTHANG SA TION SANG LUBONG NI ATTY. BENJAMIN RAMOS, NAKILAL-AN NA

Share on facebook
Share on google
Share on pinterest
Share on twitter
Share on print

SIPALAY CITY, Negros Occidental- Nakilal-an na ang duha ka mga lalaki nga na-aresto kahapon sa gymnasium sa diin ginpahamtang ang haya’ ni Atty. Benjamin Ramos.

Sa interview sang Aksyon Radyo kay Atty. Edre Olalia, Presidente sang National Union of People’s Lawyer, ginhingadlan sini ang mga suspetsado nga sanday Rodolfo Gaday Alemen Jr. kag Macoy Villahermosa nga gin-alegar lunsay mga katapo sang Armed Forces of the Philippines (AFP).

Suno kay Olalia, antis mag-las dos kahapon sang hapon (Noviembre 17, 2018) sang nagapadulong sila sa siudad sang Sipalay upod ang grupo sang BAYAN-Negros kag KARAPATAN, may namutikan sila nga duha ka mga lalaki nga nagasakay sa motorsiklo kag isa ka pick-up nga salakyan nga naga-sunod sa ila, halin pa sa siudad sang Bacolod tubtub sa siudad sang Sipalay.

Gintinguhaan nila nga patalangon ang amo nga grupo apang nasundan ini sila sa gihapon.

Suno pa kay Olalia, mga apat ka oras sila nga ginsundan kag ginakuhaan pa sang litrato.

Dugang pa ni Olalia, pag-abot na sa gymnasium sa diin nahaya’ ang bangkay ni Atty. Ramos, hinali nalang nga naghana’ gabot ang isa sa mga suspetsado sa diin amu ang nagduso sa ila agud magpangayo na sang bulig sa kapulisan.

Gin-aresto ang duha ka mga suspetsado kag nakuhaan pa sang nagkalain-lain nga ID sa diin nalakip diri ang ID sang AFP, kag duha pa ka mga armas luthang, sa diin ginkatingala naman ni Olalia bangud pag-abot sa estasyon sang kapulisan, isa na lang ang gindeklarar nga na-recover.

Samtang, gilayon naman nga nadula ang pick-up nga salakyan nga ginapatihan upod sang mga suspetsado.

Nagapati naman si Olalia nga may ginatarget gid man nga patyon ang duha ka mga suspetsado.

Samtang, ginklaro naman ni Olalia nga ila pa sa karun padayon gina-verify ang mga ngalan sang mga suspetsado nga posible nag-gamit lamang sang peke nga pangalan.

MORE STORIES:

LIKE US ON FB

error: Ooops... You are not authorized to copy this content.