Nag positibo sa Covid-19 RT-PCR test ang dugang nga duha ka lalaki nga returning OFW sa probinsya, sila ang kabahin sang 28 ka seafarers nga damlag nag abot sa syudad sang Bacolod nag ligad nga Abril 28.
Si Patient 8 ang 35 anyos nga lalaki nga nag abot sa Manila sang Marso 22 gikan sa Maimi kag residente sang Brgy. Poblacion, Valladolid.
Si Patient 9 ang 27 anyos nga lalaki nga nag abot sa Manila sang Marso 20 gikan sa Miami kag New York kag residente sang Brgy. Binubohan, Bago City.
Ang duha ka bag-o nga Covid-19 cases ang nakafacility quarantined sa syudad sang Bacolod.
Suno kay Dr. Grace Tan, spokesperson sang Bacolod IATF, Mayo 1 sang una nga gin swab ang duha ka returning OFWs kag nag negatibo sa virus.
Pero suno kay Tan, sang gin re-swab ang mga ini sang Mayo 9, Sabado nga adlaw nag gwa nga subong nga adlaw, (Mayo 13) nga positibo sila sa Covid-19 kag posible nag develop ang virus.
Gina lantaw ni Tan nga posible na infect ang duha ka asymptomatic nga OFWs samtang naga byahe pabalik sa Bacolod.
Natalana nga sayluhon ang mga nag positibo humalin sa isa ka accommodation establishment sa Barangay 7 pakadto sa isa ka quarantine facility sang syudad.
Ang Negros Occidental ang may 9 ka Covid-19 cases kag duha ang naka recover samtang ang Bacolod ang may 11 ka Covid-19 cases, anum ang naka recover kag tatlo ang napatay.| Aksyon Dale Salazar