DEALER SANG MOTOR SA DALAN LACSON, GIN HOLD-UP SANG RIDING-IN-TANDEM SUSPECTS

Share on facebook
Share on google
Share on pinterest
Share on twitter
Share on print

Ginhold-up sang duha ka mga wala pa makilal-an nga suspetsado nga riding-in-tandem ang isa ka dealer sang motor sa dalan San Sebastian-Lacson, Brgy. 32, syudad sang Bacolod takna las 3:45 kaina sang hapon Sabado.

Suno kay Police Station 1 Commander Police Major Jovil Sedel, nakawat sang mga kawatan ang 18, 550 pesos nga koleksyon sang Motortrade sa amo nga adlaw.

Ginpahayag ni Sedel nga basi sa panaysayon sang saksi, ang isa ka suspetsado nga nagasuksok sang puti nga helmet kag face mask, amo ang nagkuha sang kwarta sa kaha sang cashier samtang ang isa pa ka suspetsado nga nagasuksok sang itom nga helmet ang nagserbi nga look-out sa gwa sang opisina.

Sa imbestigasyon sang kapulisan nahibaloan nga may gina-asikaso ang cashier nga customer sang hinali nalang nga nagpalapit ang suspetsado.

Suno sa hepe, ginatayaan sang suspetsado sang kalibre 45 nga armas-luthang ang cashier samtang ginakuha ang kwarta sa sulod sang kaha. Nagpalagyo ang mga suspetsado padulong nakatundan nga bahin sang lugar kag nagsakay sa pula nga motor nga nakaparada sa atubang sang isa ka poste. Ang mga suspetsado nagpalagyo padulong dalan Mabini.

Gilayon nga nakaresponde ang mga kapulisan sa lugar sang insidente.

Ginreview na ni Sedel ang footage nga nakuha sang cctv camera sang katupad nga opisina sang motortrade apang wala pa malantaw ang kopya sang cctv footage sang motortrade bangud nga ang monitor yara pa sa ila nga main branch.

Nagpanugyan si Sedel sa mga negosyante nga nagakinahanglan gid nga magpahamtang sang gwardiya para sa seguridad sang establisyemento kag mga trabahante. | Aksyon John Diaz

MORE STORIES:

LIKE US ON FB

error: Ooops... You are not authorized to copy this content.