Naga pangabay si Bacolod City Councilor Wilson Gamboa Jr sa City Budget Office nga reviewhon ang proposal angut sa pag bakal sang pila ka mga kinahanglanon para sa Covid-19 response.
Ini matapos nga gin kwestyon ni Gamboa ang pila ka item sa 113 million pesos nga supplemental budget nga gin aprubahan sang Sangguniang Panlungsod sa special session nag ligad nga Sabado, August 29.
Ang amo nga pondo ang gikan sa local funds sang syudad kag gin re-align para sa Covid-19 response.
Apat ka mga departamento ang nag pangabay sang pondo nga gina lakipan sang Bacolod DRRMO nga 32 million pesos, Bacolod City Engineer’s Office nga 28 million pesos, DSSD nga 30 million pesos kag kag Bacolod City Health Office 22 million pesos.
Lakip sa gina kwestyon ni Gamboa ang proposal sang Bacolod CHO nga pagbakal sang 2,000 boxes sang Sodium Ascorbate Vitamin C with Zinc balor 2, 250 ang kada box ukon naga balor sang kabug-usan nga 4.5 million.
Suno kay Gamboa, nakabakal man ini nga parehas nga vitamins pero naga balor lamang sang 390 ang kada botelya.
Lakip man sa gina kwestyon ni Gamboa ang proposal nga pag bakal sang gallon sang alocohol balor 1,500 pero siya ang nakabakal sang 599 pesos per gallon lamang.
Suno pa sa konsehal, yara man sa proposal ang pag bakal sang 15 ka unit sang laptop balor 68,000 ang kada isa nga may yara man sang laptop naga balorr 30,000 tubtob 40,000.
Gina kwestyon man ni Gamboa ang gin gastuhan sa gin aprubahan man sadto nga kapin 400 million pesos para sa Covid-19 response.
Gin hangkat ni Vice Mayor El Cid Familiaran si Councilor Gamboa nga mag pasaka sang kaso kon iya nakit-an nga may anomaliya sa pag gasto sang syudad sang pondo para sa Covid-19 response.
Gin klaro ni Familiaran nga wala pa nabakal ang mga vitamins bangud sadtong Sabado pa lamang gin aprubahan ang supplemental budget.
Suno sa Bise-Alkalde, nasaad sa proposal nga ang vitamins nga pagabaklon ang per box kag indi per bottle, mag katuhay sa palayag ni Gamboa.
Gin kumpirmar ni Familiaran nga sang gin botohan ang supplemental budget wala man nag pamatok si Gamboa.
Gin paathag sang Bise-Alkalde, nga estimate lamang ang yara sa proposal kag kon may sobra man nga pondo ini ang maga diretso sa savings sang syudad sa katapusan sang tuig.
Suno pa kay Familiaran, ang una nga kapin 400 million pesos nga pondo nga gin aprubahan nga para man sa Covid-19 response ang specific nga naka allocate para sa bugas, delata, kag iban pa nga gin panagtag sang gin paidalum ang syudad sa ECQ kag indi pwede nga gastuhon sa iban nga bagay.
Suno kay Budget Officer Imelda Williams, sa kapin 400 million pesos, may kapin 200 milyones pa nga nabilin sa amo nga pondo.
Suno kay Familiaran, ang nabilin ang paga kuhaan para sa food assistance sa mga pamalay nga ma apektuhan sang lockdown sa syudad.
Para kay Familiaran, tanan nga gina gasto sang syudad ang maga-agi man sa gihapon sa Commission on Audit.
Gina kabig ni Familiaran nga pang labugay ang ginahimo sang konsehal nga gina “poison” ang panghuna-huna sang tawo para ipakita nga may anomaliya. | Aksyon Dale Salazar
