Wala pa sang kasiguraduhan nga makabaton sang collective negotiation agreement (CNA) incentives ang mga empleyado sang gobyerno probinsiyal sang Negros Occidental.
Ini ang ginklaro ni Acting Provincial Administrator Lucille Gelvolea.
Suno kay Gelvolea, luyag anay hibaluon ni Provincial Budget Officer Percival Salado Jr., ang kaundan sa policy guidelines sang Department of Budget and Management (DBM), may kaangtanan sa mga LGU’s ukon Local Government Units nga kuwalipikado sa paghatag sang amo nga insentibo.
Basi sa pagsulundan sang DBM, puwede nga makahatag sang CNA incentives ang mga LGU’s, kun ini ang may 70% pasaka nga accomplishment, ukon performance sa patag sang budget kag mga programa. Suno kay Gelvolea, 40 tubtub 50% lamang ang nalab-ot sang probinsiya, gani may posibilidad nga indi matigayon ang paghatag sa amo nga benepisyo.
Ang CNA incentives ang separado sa 14th month pay kag cash bonuses, nga ginakuha sang mga empleyado sa gobyerno kada tuig.