Ginkumpirmar ni Barangay 39 Kapitan Jude Salusada nga may duha ka kaso sang COVID-19 sa iya Barangay nga ginalakipan sang call center agent kag nurse.
Sa interview sa Aksyon Firing Line kaupod ni Aksyon Bryan Morden, ginpahayag ni Salusada nga apektado sang lockdown bangod sa nagpositibo nga call center agent ang anom ka balay sa Purok Katilingban 1.
Suno pa kay Salusada, natalana naman nga ipaidalom sa swab test bwas nga adlaw ang pito ka pamilya sang call center agent nga gindala na sa quarantine center sa syudad aang Bacolod.
Sa bahin sang nurse, ginpahayag ni Salusada nga ang kaupod lamang sini sa ginarentahan nga balay ang ginpanugyan nga magpa-swab test kag mag-home quarantine.
Dugang pa ni Salusada, wala na sang gin-lockdown nga balay bangod separado man ang gina istaran nga balay sang nagpositibo nga nurse.
Samtang, ginapanawagan ni Salusada ang kooperasyon sang pumuluyo paagi sa pagbuligay kag pagsunod sa tanan nga minimum health standard. | Aksyon Ann Defensor
