Magapatigayon sang pagsinapol ang mga negosyante upod kay Councilor Al Victor Espino, chairman sang Committee on Police Matters sa Bacolod agud masolusyonan ang pinatyanay sa siudad.
Sa interview sa Aksyon Hotline, ginpahayag ni Metro Bacolod Chamber of Commerce and Industry (MBCCI) President Frank Carbon nga magasapol sila upod kay Espino kag magaplastar sang suhestyon nga mahimo himuon sang siudad agud matapna ang pinatyanay.
Magluwas sa dugang nga police visibility, isa sa una nga ginasuhestyon sang mga negosyante amu ang pagpahamtang sang suga sa mga dalanon sa Bacolod ilabi na ang mga naligwin nga lugar.
Suno pa kay Carbon, indi dapat pag-tratuhon nga ordinaryo ang sunod-sunod na nga pinatyanay sa siudad sang Bacolod.
Dugang pa ni Carbon, bilang negosyante, maka-apekto gid ini sa ila kag sa ekonomiya sang Bacolod bangud sa posible kahadlok nga ituga sa mga negosyante nga luyag mag-invest sa siudad.
Ginpahayag ni City Councilor Al Victor Espino, nga iya na ginatugyan sa kapulisan ang pag imbestigar sa kaso sang mga pagpangluthang sa syudad sang Bacolod.
Suno kay Espino, ang Sangguniang Panlungsod ang indi ‘proper body’ para ma solusyunan ang amo nga problema kag dapat manguna dire ang law enforcement agency kaangay sang Bacolod City Police Office.
Para kay Espino, sang nag umpisa ang karon nga administrasyon, kag karon manugtapos na ang ila termino, tubtob karon wala pa ini masolusyunan.
Dugang pa sang Konsehal, para sa iya mas nakahibalo kag naka intiende ang kapulisan sa ila nga trabaho.
Sa nahibaluan, humalin Enero tubtob Pebrero 24, dose ka mga insidente sang pagpangluthang ang nagluntad sa separado nga mga lugar sa Bacolod. | Aksyon Dorel Cabatu, Aksyon Dale Salazar
