Umpisa subong nga adlaw, Sabado, ginpaidalom sa pito ka adlaw nga lockdown ang bilog nga Barangay Mambulac syudad sang Silay Negros Occidental.
Sandig sa Special Executive Order (EO) No. 2020-08-09 series of 2020 nga ginpirmahan ni Mayor Mark
Golez, magalawig ang lockdown tubtub Setyembre 5, 2020 para hatagan sang kahigayunan ang disinfection, sanitation kag decontamination measures kag mapunggan ang paglapta sang Covid-19.
Suno sa EO, ang household nga may probable, suspected, ukon confirmed Covid-19 cases, ang ginadumilian nga magwa sa ila puluy-an.
Magluwas sa Authorized Persons Outside their Residences (APOR) , isa lamang ka persona ang tugutan nga makagwa sa puluy-an kag may importante nga tinotoyo.
Dapat man nga ini ang magpresentar sang Home Quarantine Pass, kag ID.
Ginadumilian man ang pagbaligya, pagbakal ukon pag-inom sang makahulubog sa pampubliko nga lugar. Suspended man ang operasyon sang Public Utility Vehicles sa amo nga barangay.
Ginpirmahan ang EO sadtong Agusto 27, 2020. | Aksyon Marlon Genovea