Ginsuhestyon ni San Carlos City Bishop Gerardo A. Alminaza kay Governor Bong Lacson nga magtukod sang renewable energy council, agud malab-ot ang handum nga mangin renewable energy hub ang Negros Occidental.
Sa sinapol nga ginpatigayon sa kapitolyo subong nga adlaw, ginsiling ni Alminaza nga tion na agud seryusohon sang gobyerno nasyonal kag probinsiyal ang amo nga plano kag ipasiguro nga indi maapektohan ang palibot.
Nagapati si Alminaza nga ini ang matigayon, bangud madamo na sang ginhimo nga mga pagtuon, kag nakitar naman ang mga problema kag isyu nga dapat sulbaron.
Si Alminaza nga nagaserbe bilang lider sang “withdraw from coal campaign”, ang isa sa mga nagapamatok sa 300-megawatt (MW) SMC Global Negros power station coal-fired power station sa San Carlos City , Negros Occidental.
Ginpasalig ni Lacson nga handa ang gobyerno probinsiyal sang Negros Occidental sa pagtukod sang renewable energy council.
Ginpahayag sang gobernador nga magapangita ang probinsiya sang mga magabug-os sa technical working group sa sulod sang duha ka semana.
Dugang pa ni Lacson, mas maayo nga magahalin sa pribado nga sektor ang magapamuno sa pagatukuron nga council. | Aksyon Marlon Genovea