Nakumpiskar sang Bureau of Internal Revenue (BIR)-6 ang masobra 1400 ka mga kaha sang peke nga sigarilyo sa isa ka bodega sa Bacolod Real Estate and Development Corporation (BREDCO) Port, Setyembre 12.
Suno kay BIR-6 Regional Director Antonio Jonathan Jaminola, nakabaton sang report ang BIR kag Crime Investigation and Detection Group nga may nagamanufacture kag nagabaligya sang peke nga sigarilyo sa amo nga lugar rasun kun ngaa ila ini ginmonitor kag gin-operate ini.
Nakit-an sa sulod sang bodega ang 805 ka mga master cases kag 666 ka mga filter cases nga wala nag-agi sa insakto nga proseso.
Dugang pa ni Jaminola, kun sumahon magadangat sa kapin 14 milyones pesos nga excise tax ang bayaran kuntane sang manufacturer sang amo nga mga sigarilyo kun ini ang ginpaagi sa nagakaigo nga proseso.
Pagpahayag ni Jaminola, makit-an nga peke ang documentary stamp nga gingamit sa mga kaha sang sigarilyo.
Kilala na sang BIR ang tag-iya sang mga sigarilyo apang ginapreparar pa ang mga dokumento rasun kun ngaa wala ginpalayag ang ngalan sini.
Kaso nga paglapas sa layi nga nagadumili sa paghupot sang peke nga sigarilyo kag tax evasion ang ipasaka batuk sa tag-iya sang amo nga mga sigarilyo. | Aksyon John Diaz