Nagapanginbulahan ang Bureau of Fisheries and Aquatic Resources (BFAR)-6 Negros Occidental Field Unit sa mga magagmay nga urban farmers nga nagbantog bangud sang ila pinasahi nga istilo kag modelo sa pagpanguma apisar nga nagapuyo sa urban areas sa piyak sang COVID-19 pandemic.
Sa interview sang Aksyon Radyo Bacolod kay Marianne Jill Abeto, Officer-In-Charge sang BFAR-6 Negros Occidental Field Unit, ginpasalamatan sini ang mga persona nga may inisyatibo sa paghimo sang tikang may kaangtanan sa pagtipig sa dunang manggad kag pagsagod sang mga kasapatan sa pamaagi nga indi makahalit sa palibot.
Suno kay Abeto, ang “aquaponics” isa na karun ka programa nga ginatutukan sang Department of Agriculture (DA) kag BFAR sa tinutuyo nga matudluan sang moderno nga pamaagi ang publiko sa pagpananum.
Ginpabutyag ni Abeto nga natalana nga magbisita ang BFAR sa pila ka mga urban farmers agud makit-an ang ila nga modelo sang aquaponics nga mahimo kuhaan man sang mga pagtuon agud mas mapaayo ang sistema nga luyag ipatuman sang BFAR sa ginaduso sini nga urban farming project.
Dugang pa ni Abeto, ang DA ang una na nga naglansar sang “aquaponics models” sa national office sa Metro Manila.
Ginalauman nga sa masunod na nga bulan igalansar sa probinsya sang Negros Occidental ang “aquaponics” apang nakadependi pa ini sa sitwasyon bangud sang COVID-19 pandemic.
Mahimo nga makakuha sang kapin 500 ka mga similya sang isda nga tilapia nga libre ang maluyag magsugod sang urban farming sa ila nga ugsaran.
Pagpahayag ni Abeto, isa man sa programa sang BFAR-6 ang pagbulig sa mga pumuluyo nga mainchindihan ang pamaagi sa paghimo sang nauyunan nga modelo sang aquaponics.
Sa programa sang BFAR nga “Urban Agriculture: Isdayan ni Ani at Kita”, tatlo ka mga backyard aquatic models ang natalan sini nga ilansar kun sa diin magagamit ini sang solar power imbes nga kuryente.
Ginpalayag ni Abeto nga sa balor nga 20,000 ka pesos makapatukod na sang kaugalingon nga aquaponics ang mahiligon sa pagsagod sang tanum kag kasapatan. | Aksyon John Diaz