Nagaisahanon ang banwa sang Ilog sa mga lugar sa Negros Occidental nga wala na sang narekord nga Covid-19 Persons Under Monitoring ukon (PUM).
Ini ang basi sa datus sang Provincial Incident Management Team ukon (PIMT) as of June 5.
Suno sa PIMT, naglab-ot sa 1,722 ang mga PUMs sa probinsiya, sa diin 889 sa mga ini ang residente sang 30 ka mga banwa kag syudad, kag 833 ang gina-quarantine sa 13 ka mga quarantine facilities, kalakip na sa mga inns, kag hotel sa Bacolod.
Samtang ginpahayag naman sang Ilog Municipal Health Office ukon (IMHO), nga ila ginsuspender ang pag-isyu sang medical clearance sa mga Ilognons nga nagaplano sa pagpadulong sa banwa sang Mabinay Negros Oriental.
Ini agud masiguro nga indi makalaton ang virus nga posible makuha sang mga Ilognons halin sa Mabinay.
Suno sa IMHO, maga-isyu lamang sila sang clearance sa mga residente sang Mabinay nga nastranded sa Ilog.
Nagligad nga adlaw, 60 ka mga balay sa Mabinay ang gin lockdown matapos mahibaluan nga naglagaw sa amo nga lugar, ang isa ka nagpositibo sa Covid-19. | Aksyon Marlon Genovea