Negros Occidental- Ginsaylo na sa syudad sang Sipalay ang bangkay ni Atty. Ben Ramos sa diin gin updan sang indi magnubo sa singkwenta (50) ka mga salakyan nga boluntaryo nag upod sa convoy gikan sa syudad sang Kabankalan alas 8:30 kaina sang aga.
Suno kay September 21 Movement Secretary General Ipe Gelle, ang bangkay ni Ramos ang gindala sa Brgy. 5 Poblacion sa amo nga syudad sa diin nangin tumandok ang gin patay nga abogado.
Dugang pa ni Gelle, maga tinir sang pila ka adlaw ang bangkay ni Ramos sa amo nga Barangay antis sayluhon sa Gymnasium sang syudad para mangin mahapos ang pagbisita sang publiko ilabi na ang iya mga nabuligan.
Dismayado naman ang pamilya ni Ramos suno pa kay Gelle bangud sa mahinay kag wala sang klaro nga imbistigasyon sang kapulisan.
