Isa ka apprentice sa barko nga MV Erson Menard nga ginapanag-iyahan sang Sherwin Shipping Corp. ang nasapwan nga patay sadtong Lunes sang aga nga nagalutaw sa baybayon boundery sang Bacolod City kag Buenavista probinsya sang Guimaras.
Ang biktima ginkilala kay Christian Ducay, 26 anyos soltero kag tumandok sang Tabak Bantayan, Cebu.
Ang biktima ginkilala sang iya iloy nga si Leonida Ducay matapos magkadto ini kaina sang aga Police Station 9.
Suno kay Police Major Ritchie Gohee, hepe sang Police Station 9, may karga sang semento ang ginasakyan ni Ducay kag nagabyahe Iligan-Palawan sa diin ini siya naglumpat sa baybayon sang Siquijor kag Apo Island.
Suno kay Gohee, nagapati ang pamilya sang napatay nga may foul-play ang kamatayon ni Ducay kag wala ini naglumpat.
Suno kay Gohee may apat ka persona nga upod si Ducay nga iya gin-chat sa iya pamilya nga dapat imbestigahan kon may malain nga matabo sa iya.
Suno kay Gohee, una na nga nagreport ang kapitan sang barko nga si Virgilio Catampo sa Bantayan Phil. Coastguard nga naglumpat si Ducay bangod sang mental breakdown nga ginsuportahan sang apat ka mga crew nga amo man ang ginatumod sa chat ni Ducay.
Ginpa-autopsy na sang pamilya ang bangkay ni Ducay kag matapos ini dal-on nila balik sa Tabak Bantayan Cebu.
Suno kay Gohee, nagpasalamat ang pamilya Ducay sa duha ka mangingisda nga magdala sang bangkay ni Christian pakadto sa suba sang Brgy. Sum-ag syudad sang Bacolod. | Aksyon Eric Magbanua